कोल्हापूर  : कंदलगाव–कणेरी मठ हद्दीतील गिरगाव रोड परिसरात बुधवारी मध्यरात्री एका ४५ वर्षीय व्यक्तीचा नायलॉनच्या दोरीने गळा आवळून आणि तोंडावर मारहाण करून अत्यंत निर्घृणपणे खून करण्यात आल्याची थरारक घटना उघडकीस आली आहे. या घटनेमुळे कंदलगाव, कणेरी मठ परिसरासह संपूर्ण जिल्ह्यात एकच खळबळ उडाली असून नागरिकांमध्ये भीतीचे वातावरण निर्माण झाले आहे. 

महादेव बाळू बोडके (वय ४५, रा. साळवण, तिवडे, ता. गगनबावडा) असे मृत व्यक्तीचे नाव असून, बुधवारी मध्यरात्री ते शेतवडी परिसरात गंभीर जखमी अवस्थेत आढळले होते. स्थानिकांनी त्यांना तातडीने सीपीआर रुग्णालयात दाखल केले; मात्र उपचारापूर्वीच त्यांचा मृत्यू झाला. 

या घटनेची माहिती मिळताच गोकुळ शिरगाव पोलिसांनी घटनास्थळी धाव घेत पंचनामा केला. प्राथमिक अंदाजानुसार ही पूर्वनियोजित हत्या असल्याचे दिसत असून, पोलीस सीसीटीव्ही फुटेज, तांत्रिक माहिती आणि पुराव्यांच्या आधारे मारेकऱ्यांचा कसून शोध घेत आहेत.