कोल्हापूर : सहकार कायद्यातील निवडणूक विषयक नियमांमुळे कोल्हापूर सर्किट बेंचने ठरवून दिलेला ९० दिवसांच्या कालावधीत गोकुळची निवडणूक घेणे शक्य नाही. यामुळे या निवडणुकीसाठी विभागीय सहकार उपनिबंधकांना आवश्यक तो कालावधी वाढवून द्यावा, अशी मागणी श्रीराम दूधसंस्था, चुयेचे संचालक, पदवीधर मित्र माणिक पाटील (चुयेकर) यांनी एका प्रसिद्धी पत्रकाद्वारे केली आहे.

फडणवीस सरकार दीर्घकाळसाठी स्वतःच्या सोयीच्या लोकांचे खाजगी प्रशासक मंडळ गोकुळवर नेमल या अनावश्यक भीतीपोटी मागील संचालक मंडळाने, संचालक मंडळाची मुदत संपल्यानंतर लगेचच निवडणूक घेण्याची मागणी उच्च न्यायालयात केली होती. यावर निकाल देताना न्यायालयाने निवडणुका ९० दिवसांच्या आत घेण्याचा निर्णय दिला होता.

परंतु सहकार कायद्यातील निवडणूकविषयक नियमनुसार या निवडणूक प्रक्रियेस आवश्यक तो कालावधी न दिल्यास गोकुळ निवडणुकीचा अंतिम निकाल कायद्याच्या कचाट्यात अडकून काही सभासद सर्वोच्च न्यायालयापर्यंत जातील. यामुळे नवीन संचालक मंडळ स्थापन होण्यास प्रदीर्घ कालावधी जाईल असे प्रसिद्धी पत्रकात पुढे म्हटले आहे.