कोल्हापूर : वारस आणि फेरफार नोंदीच्या नावाखाली गरिबांची लूट करणाऱ्या एका भ्रष्ट अधिकाऱ्याचा कोल्हापूर लाचलुचपत प्रतिबंधक विभागाने (एसीबी) पर्दाफाश केला आहे. शिरोळ येथील उपअधीक्षक भूमि अभिलेख कार्यालयातील निमतानदार संजय बापू तेली (वय ५२, रा. आळते, ता. हातकणंगले) याला २ हजार रुपयांची लाच घेताना एसीबीच्या पथकाने रंगेहात पकडले आहे. या कारवाईमुळे शासकीय कार्यालयातील भ्रष्टाचाराचा मुद्दा पुन्हा एकदा ऐरणीवर आला आहे.

तक्रारदाराच्या आई-वडिलांच्या निधनानंतर त्यांच्या मालमत्तेवर वारस आणि फेरफार नोंद करण्यासाठी तक्रारदाराने शिरोळ येथील भूमि अभिलेख कार्यालयात अर्ज केला होता. हे काम निमतानदार संजय तेली याच्याकडे होते. काम पूर्ण करण्यासाठी तेली याने तक्रारदाराकडे २ हजार रुपयांच्या लाचेची मागणी केली. लाच देण्याची इच्छा नसल्याने तक्रारदाराने कोल्हापूर एसीबीकडे धाव घेतली. एसीबीने केलेल्या पडताळणीमध्ये तेली याने लाच मागितल्याचे निष्पन्न झाले. त्यानंतर रचलेल्या सापळ्यात तक्रारदाराकडून लाचेची रक्कम स्वीकारताना तेलीला रंगेहात अटक करण्यात आली. सध्या त्याच्यावर शिरोळ पोलीस ठाण्यात गुन्हा दाखल करण्याची प्रक्रिया सुरू आहे.

ही कारवाई एसीबीचे पोलीस उपआयुक्त/पोलीस अधीक्षक शिरीष सरदेशपांडे आणि अपर पोलीस अधीक्षक अर्जुन भोसले यांच्या मार्गदर्शनाखाली पोलीस उपअधीक्षक वैष्णवी पाटील यांच्या पथकाने यशस्वीरीत्या पार पाडली. या घटनेमुळे सरकारी कामांसाठी लाच मागणाऱ्या भ्रष्ट कर्मचाऱ्यांचे धाबे दणाणले आहेत.