कोल्हापूर : आगामी गोकुळ दूध संघ निवडणुकीत महायुतीचाच मोठा वरचष्मा राहील आणि गोकुळची ही निवडणूक महायुती म्हणून लढवून २५ विरुद्ध शून्य असाच विजय मिळवला जाईल, असा विश्वास खासदार धनंजय महाडिक यांनी व्यक्त केला आहे. प्रसारमाध्यमांशी बोलताना त्यांनी आगामी राजकीय समीकरणांवर भाष्य केले.

विधानसभा निवडणुकीच्या वेळेस जसा १० पैकी १० आमदार महायुतीचे आले आणि १०-० असा स्कोअर राहिला, अगदी तसाच गोकुळमध्येही २५ च्या २५ जागा महायुतीच्याच येतील आणि महाविकास आघाडीचा स्कोअर शून्य राहील, असा दावा खासदार महाडिक यांनी केला. निवडणुकीचे राजकारण तापले असून अनेक तक्रारी आणि कायदेशीर प्रक्रिया सुरू असल्या, तरी गोकुळमधील सभेचे सभासद आणि ठरावधारक मोठ्या संख्येने महायुतीच्या पाठीशी आहेत.

सध्या काही विरोधक सोबत येण्याच्या गोष्टी करत असले तरी, राजकारणात कोणीही कायमचा शत्रू किंवा मित्र नसतो. परंतु, गोकुळ निवडणुकीत एकदम असे बदल होणे कठीण आहे. पाच वर्षांपूर्वी महाविकास आघाडीचे सरकार असताना आणि सत्तेची सूत्रे असतानाही विरोधकांनी दमदाटी करून कसेतरी पॅनेल बनवले होते आणि अतिशय कमी मतांनी पराभव केला होता. आता तीच महाविकास आघाडी समविचारी आघाडी म्हणून विरोधात उभी ठाकणार असली, तरी महायुती एकजुटीने ही निवडणूक लढवून बाजी मारेल.
गोकुळ निवडणुकीतील विविध घडामोडींवर आणि जागावाटपावर महायुतीचे नेते लवकरच योग्य तो निर्णय घेतील आणि एक, दोन दिवसांत निवडणुकीच्या अधिकृत भूमिका स्पष्ट केल्या जातील, असेही खासदार महाडिक यांनी शेवटी स्पष्ट केले.