पन्हाळा : येथील शिवतीर्थ उद्यानामध्ये महिलेच्या गळ्यातील सापडलेले मंगळसूत्र प्रामाणिकपणे परत करून माणुसकी जिवंत असल्याचे उदाहरण पहावयास मिळाले. शिवतीर्थ उद्यानामध्ये आज सायंकाळी पन्हाळा येथील रहिवासी तब्बसूम गुलामरसूल सय्यद यांच्या गळ्यातील मंगळसूत्र गहाळ झाले होते. हे मंगळसूत्र इचलकरंजी येथील फिरोज राजेखान सनदी यांच्या कुटुंबीयांना मिळाले त्यांनी ते पन्हाळा पोलीस ठाण्यामध्ये ठाणे अंमलदार पोलीस नाईक विनोद जाधव यांच्या उपस्थितीत परत केले.

याबाबत अधिक माहिती अशी की फिरोज सनदी पन्हाळा येथील जहाॅखान पठाण या नातेवाईकांच्याकडे कुटुंबीय फिरण्यासाठी आले होते. आज सायंकाळी शिवतीर्थ उद्यानामध्ये कुटुंबासह होते दरम्यान पन्हाळा येथील तब्बसूम सय्यद या नातेवाईकांसह बागेमध्ये आल्या होत्या.

 दरम्यान फिरोज सनदी यांना महिलेच्या गळ्यातील मंगळसूत्र सापडले त्यांनी परिसरात सुरुवातीला चौकशी केली. आणि पन्हाळा पोलीस ठाण्याशी संपर्क साधला. दरम्यान संबंधित मंगळसूत्र सय्यद यांची असल्याचे खात्री झाल्यानंतर हे मंगळसूत्र पन्हाळा पोलीस ठाण्यामध्ये ठाणे अंमलदार पोलीस नाईक विनोद जाधव यांच्या उपस्थिती सुपूर्द केले. प्रामाणिकपणे मंगळसूत्र परत करणाऱ्या सनदी कुटुंबीयाचे परिसरात कौतुक होत आहे.