मुंबई: मुंबईतील वरळी परिसरात घरगुती आणि व्यावसायिक गॅस सिलिंडरची अवैध साठेबाजी आणि काळाबाजार करणाऱ्या टोळीवर शिधावाटप विभागाने जोरदार प्रहार केला आहे. एका गुप्त माहितीच्या आधारे टाकलेल्या छाप्यात सिलिंडरचा मोठा साठा जप्त करण्यात आला असून, यामुळे परिसरात खळबळ उडाली आहे.
धोकादायक साठेबाजीचा पर्दाफाश
वरळी नाका येथील गणपतराव कदम मार्गावर असलेल्या ‘सूरज वल्लभदास चाळ’ परिसरात रहिवासी वस्तीत अत्यंत धोकादायक पद्धतीने सिलिंडर साठवले जात होते. चढ्या दराने विक्री आणि बेकायदेशीर रिफिलिंगचा गोरखधंदा येथे सुरू असल्याची माहिती नियंत्रक शिधावाटप कार्यालयाला मिळाली होती. फिरते पथक आणि कार्यालय क्रमांक २१ च्या अधिकाऱ्यांनी संयुक्त मोहीम राबवून या टोळीचा पर्दाफाश केला.

या कारवाईत एचपी गॅस आणि सुपर गॅस कंपनीचे विविध वजनाचे सुमारे ७० हून अधिक भरलेले सिलिंडर आणि मोठ्या प्रमाणात रिकामे सिलिंडर जप्त करण्यात आले आहेत. यामध्ये ५ किलो, १२ किलो आणि ४ किलोच्या सिलिंडरचा समावेश आहे. हा सर्व साठा जप्त करून पुढील फौजदारी कारवाईसाठी वरळी पोलीस ठाण्याच्या स्वाधीन करण्यात आला आहे.

"रहिवासी भागात अशा प्रकारे ज्वलनशील पदार्थांची साठवणूक करणे म्हणजे नागरिकांच्या जीविताशी खेळणे आहे," असे प्रशासनाने स्पष्ट केले आहे. नियंत्रक शिधावाटप चंद्रकांत डांगे यांच्या मार्गदर्शनाखाली ही कारवाई करण्यात आली.

 गॅसचा काळाबाजार करणाऱ्यांविरोधात यापुढेही अशीच कठोर मोहीम राबवली जाईल, असा इशारा शिधावाटप विभागाने दिला आहे.