▪️महापालिकेच्या फुलेवाडी फायर स्टेशनच्या स्लॅबवेळी दुर्घटना
कोल्हापूर: महापालिकेच्या फुलेवाडी फायर स्टेशनच्या स्लॅब पडून झालेल्या अपघातात नवनाथ अण्णाप्पा कागलकर (वय ३५, रा.नवशा मारुतीजवळ राजारामपुरी) हे मृत झाले तर अक्षय मृत ३०, रा. शिवशक्ती कॉलनी, गंगाई लॉन फुलेवाडी), दत्तात्रय सुभाष शेंबाडे (वय ३७, रा. सुधाकर जोशीनगर, संभाजीनगर), वैभव राजू चौगुले (वय २५, रा.बेलबाग मंगळवारपेठ) हे गंभीर जखमी झाले. तर जया शेंबडे व सुमन वाघमारे या महिला किरकोळ जखमी झाल्या. जखमींना  सीपीआर रुग्णालयात उपचारासाठी दाखल करण्यात आले. 

 स्लॅबचे शेवटच्या एकाच पोत्याचे काम राहिले असताना हा दुर्देवी प्रकार घडला.स्लॅब कोसळल्यानंतर परिसरात मोठा आवाज झाल्याने नागरिकांनी घटनास्थळी धाव घेतली. वाहनधारकांनीही आपली वाहने थांबवून बचावकार्यात मदत करण्यास सुरुवात केली.

फुलेवाडी येथील फायर स्टेशन क्रमांक पाचच्या नव्या इमारतीच्या पहिल्या मजल्याचा स्लॅब टाकण्याचे काम सोमवारपासून सुरु आहे. मंगळवारी सकाळी प्रत्यक्षात स्लॅब टाकण्यास सुरुवात केली होती. रात्री पावणे नऊच्या सुमारास शेवटच्या एका पोत्याचे काम शिल्लक असताना साहित्य वाहून नेणाऱ्या लिफ्टचा धक्का स्लॅबला लागल्याने स्लॅब कोसळला. यावेळी स्लॅबवर चारजण तर स्लॅबच्या खाली दोन कामगार होते. स्लॅब कोसळताना त्याचा मोठा आवाज आल्याने स्लॅबवरील चौघांनी उड्या मारल्या. यातील दोघेजण स्लॅबबरोबर खाली आले. त्यामुळे स्लॅबखाली चौघेजण दबले गेले. यात नवनाथ कागलकर यांचा जागीच मृत्यू झाला. दुर्घटनेनंतर जमलेल्या गर्दीतील अनेकांनी महापालिकेच्या कारभाराविरोधात संताप व्यक्त केला

दरम्यान महापालिकेच्या फुलेवाडी येथील फायर स्टेशन क्रमांक पाचच्या नव्या इमारतीचा स्लॅब कोसळल्यानंतर प्रशासक के, मंजुलक्ष्मी यांनी मंगळवारी रात्री उशिरा या दुर्घटनेची चौकशी करण्यासाठी अतिरिक्त आयुक्त रविकांत आडसूळ व उपशहर अभियंता रमेश मस्कर यांची दोन सदस्यीय समिती नेमली आहे. या चौकशीचा अहवाल आज, बुधवारी सकाळी ९ वाजेपर्यंत देण्याचे आदेश देण्यात आले आहेत.