गेले आठवडे-दोन आठवडे जिल्ह्याचे राजकारण कोल्हापूर जिल्हा मध्यवर्ती सहकारी बँकेच्या निवडणुकीने अक्षरशः ढवळून निघाले. जिल्ह्यातील शेतकरी, सेवा संस्था, दूध संस्था, बचत गट, इतर लघु उद्योगांना जिल्हा बँकेतूनच मोठ्या प्रमाणात कर्जपुरवठा केला जातो. त्यांच्याशी दररोज संलग्नित असलेल्या जिल्हा बँकेवर सत्ता स्थापनेसाठी राजकारण्यांची चढाओढ असते. त्यात राज्याचे नेतृत्व करणारे मंत्रीही अपवाद नाहीत. 

राज्यात आघाडी करून सत्तेत आलेल्या शिवसेना, राष्ट्रवादी आणि काँग्रेसने कोल्हापूर जिल्हा बँक निवडणूक बिनविरोध करण्यासाठी पाऊल उचलले होते. मंत्री हसन मुश्रीफ, पालकमंत्री सतेज पाटील, आमदार पी. एन. पाटील, आमदार राजेश पाटील, माजी आमदार अमल महाडिक हे सहाजण त्यांच्या तालुक्यातून सेवा संस्था गटातून बिनविरोध निवडून आले. पण जागावाटपावरून माशी शिंकली आणि आघाडीत बिघाडी झाली. चर्चा फिस्कटल्याने शिवसेनेने राजर्षी शाहू शेतकरी परिवर्तन विकास आघाडी या नावाखाली निवडणूक लढवायचा निर्णय घेतला. तर भाजपने सत्तारूढ गटासोबत राहणे पसंत केले. सत्तारूढ गटाचे नेतृत्व बँकेचे अध्यक्ष ग्रामविकासमंत्री हसन मुश्रीफ, पालकमंत्री सतेज पाटील, सार्वजनिक आरोग्य राज्यमंत्री राजेंद्र पाटील-यड्रावकर यांच्याकडे होते. शिवसेनेचे खासदार संजय मंडलिक, शेकापचे माजी आमदार संपतराव पवार यांच्या नेतृत्वाखाली विरोधकांनी सत्तारूढ गटाविरुद्ध शड्डू ठोकला. जागावाटपावेळी विनय कोरे यांनी तीव्र विरोध केल्याने बाबासाहेब पाटील-आसुर्लेकर यांना उमेदवारी नाकारण्यात आली. त्यांना संजय मंडलिक यांनी उमेदवारी देत 'परिवर्तन'च्या पंखाखाली घेतले.