कोल्हापूर : कोल्हापूर महानगरपालिकेच्या महापौर निवडीच्या पार्श्वभूमीवर काँग्रेस पक्षाच्या नवनिर्वाचित नगरसेवकांची बैठक आज अजिंक्यतारा कार्यालयात पार पडली. या बैठकीत विधानपरिषदेतील काँग्रेसचे गटनेते आमदार सतेज पाटील यांनी नगरसेवकांना मार्गदर्शन करत, लोकशाहीमध्ये जनतेने काँग्रेसला सर्वात मोठा पक्ष म्हणून निवडून दिला असून सभागृहात जनतेच्या प्रश्नांसाठी ही ताकद दाखवण्याचं आवाहन केलं.

गेल्या अनेक वर्षांपासून रखडलेली कोल्हापूर महानगरपालिकेची निवडणूक नुकतीच पार पडली असून आज महापौर आणि उपमहापौर पदासाठी निवड प्रक्रिया झाली. या पार्श्वभूमीवर काँग्रेस पक्षाच्या सर्व नगरसेवकांची बैठक आज सकाळी अजिंक्यतारा कार्यालयात बोलावण्यात आली होती.

बैठकीत बोलताना आमदार सतेज पाटील म्हणाले की, महापौर निवडीसाठी काँग्रेसला बिनविरोध प्रस्ताव देण्यात आला होता. मात्र जनतेने काँग्रेसला सर्वाधिक जागा देत मोठा पक्ष म्हणून निवडून दिलं आहे. त्यामुळे लोकशाही प्रक्रियेत सभागृहात आपलं अस्तित्व ठामपणे मांडणं गरजेचं आहे.
जनतेच्या प्रश्नांसाठी विरोधक म्हणून एकत्रितपणे संघर्ष करा, सभागृहात पार्टी स्पिरीट दाखवा आणि सकारात्मक भूमिका घ्या, अशा नगरसेवकांना सूचना दिल्या.

सत्ताधाऱ्यांनी मनमानी निर्णय घेऊ नयेत, यासाठी सक्षम विरोधकाची भूमिका महत्त्वाची असल्याचं नमूद करत, निधी फक्त सत्ताधारी नगरसेवकांनाच मिळू शकत नाही. काँग्रेसकडे मोठी संख्याबळ असल्यामुळे सत्ताधाऱ्यांना आमची दखल घ्यावीच लागेल, असंही त्यांनी स्पष्ट केलं.

केंद्रातील राजकारणाचा संदर्भ देताना आमदार सतेज पाटील म्हणाले की, संसदेत विरोधकांची संख्या सुमारे दोनशेच्या आसपास असून आमच्यात एकजूट असल्यामुळे पंतप्रधान अनेकदा संसदेत यायला टाळतात. हीच भूमिका महापालिकेतही काँग्रेसच्या नगरसेवकांनी विरोधक म्हणून घ्यावी, असं त्यांनी सांगितलं.

बैठकीला आमदार जयंत आसंगावकर, माजी आमदार ऋतुराज पाटील, शिवसेना ठाकरे गटाचे शहरप्रमुख सुनील मोदी, बाळासाहेब सरनाईक, सरलाताई पाटील, गटनेते नगरसेवक इंद्रजीत बोंद्रे, राजू लाटकर, संजय मोहिते यांच्यासह काँग्रेसचे नवनिर्वाचित नगरसेवक, पदाधिकारी आणि कार्यकर्ते मोठ्या संख्येने उपस्थित होते.