कोल्हापूर : आंबेडकरी समाज संघटना आणि विश्वरत्न डॉ. बाबासाहेब आंबेडकर जयंती उत्सव समितीच्या वतीने १४ एप्रिल रोजी सायंकाळी ५:०० वाजता ऐतिहासिक दसरा चौक मैदानावर भव्य जनप्रबोधन महासभेचे आयोजन करण्यात आले आहे. या सभेमध्ये ज्येष्ठ आंबेडकरी विचारवंत पद्मश्री लक्ष्मण माने, डॉ. अच्युत माने आणि घटनातज्ज्ञ डॉ. सुरेश माने यांचे जाहीर व्याख्यान होणार आहे. 

भारतीय संविधान, समाजकारण, राजकारण आणि धर्मकारण या विषयांवर यावेळी मान्यवर मार्गदर्शन करणार आहेत.

या सभेचे उद्घाटन खासदार शाहू महाराज छत्रपती यांच्या हस्ते होणार असून, अध्यक्षस्थानी प्रा. शहाजी कांबळे असतील. प्रमुख पाहुणे म्हणून पालकमंत्री ना. प्रकाशराव आबीटकर, खासदार धनंजय महाडीक, आमदार सतेज पाटील, आमदार राजेश क्षीरसागर आणि कोल्हापूरच्या महापौर रूपाराणी निकम यांची उपस्थिती राहणार आहे.

 यावेळी विविध क्षेत्रातील मान्यवर आणि लोकप्रतिनिधी उपस्थित राहून मार्गदर्शन करणार आहेत. ही सभा यशस्वी करण्यासाठी समितीचे अध्यक्ष अनिल धनवडे, कार्याध्यक्ष रूपाताई वायदंडे, सचिव संजय जिरगे यांच्यासह सर्व पदाधिकारी व कार्यकर्ते विशेष परिश्रम घेत आहेत. या महासभेला नागरिकांनी मोठ्या संख्येने उपस्थित राहावे, असे आवाहन समितीच्या वतीने करण्यात आले आहे.