कोल्हापूर : इतर मागास वर्ग, विमुक्त जाती, भटक्या जमाती व विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी शासकीय वसतिगृह योजना, ज्ञानज्योती सावित्रीबाई फुले आधार योजना व पंडित दिनदयाळ उपाध्याय स्वयं योजनेअंतर्गत प्रवेशासाठी  10 ऑक्टोबर 2026 पर्यंत मुदतवाढ जाहीर करण्यात आली आहे.

​सन २०२६-२७ या वर्षातील १२ वी नंतरच्या व्यावसायिक व अव्यावसायिक शिक्षण घेणाऱ्या विद्यार्थ्यांसाठी https://hmasnew.mahait.org/](https://hmasnew.mahait.org या संकेतस्थळावर ऑनलाईन प्रवेश अर्ज भरण्याची सुविधा उपलब्ध करून देण्यात आली होती. या योजनेअंतर्गत महानगरापालिका क्षेत्रातील महाविद्यालयांच्या पात्र विद्यार्थ्यांना वार्षिक रु. ४३ हजार (महानगरपालिका क्षेत्रातील विद्यार्थ्यांनी शासकीय वसतिगृह योजनेस अर्ज करणे अनिवार्य आहे) व तालुका क्षेत्रातील महाविद्यालयांच्या पात्र विद्यार्थ्यांना वार्षिक रु. ३८ हजार इतका लाभ दिला जातो.  

​कोल्हापूर जिल्ह्यातील महाविद्यालयांत व्यावसायिक व अव्यावसायिक अभ्यासक्रमासाठी सन २०२६-२७ या शैक्षणिक वर्षात नव्याने प्रवेश घेतलेल्या विद्यार्थ्यांना तांत्रिक अडचणींमुळे ऑनलाईन अर्ज भरता आला नव्हता. त्यामुळे अशा विद्यार्थ्यांना दिनांक १० ऑक्टोबर २०२६ अखेर ऑफलाईन अर्ज सादर करण्याची मुदत देण्यात आली आहे.  

​पात्र विद्यार्थ्यांनी आपले ऑफलाईन अर्ज 'सहायक संचालक, इतर मागास बहुजन कल्याण, डॉ. बाबासाहेब आंबेडकर सामाजिक न्याय भवन, विचारे माळ, तिसरा मजला, कोल्हापूर' या कार्यालयात जमा करावेत, असे आवाहन सहायक संचालक सुनीता नेर्लीकर यांनी केले आहे.