भुदरगडमध्ये पर्यावरणपूरक गणेशोत्सवातून पर्यावरण संवर्धनाला बळ
schedule04 Oct 26 person by visibility 72 categoryसामाजिक
◼️20 हजार 630 गणेशमूर्तींचे संकलन;
◼️6.3 टन निर्माल्याचे स्वतंत्र व्यवस्थापन
◼️33 टन प्लास्टर ऑफ पॅरिस जलस्रोतांत जाण्यापासून रोखले
कोल्हापूर : सेवा संकल्प अभियानांतर्गत पंचायत समिती भुदरगड व जिल्हा परिषद कोल्हापूर यांच्या पुढाकारातून यंदाचा गणेशोत्सव पर्यावरणपूरक पद्धतीने साजरा करण्यात आला. गटविकास अधिकारी डॉ. शेखर जाधव यांच्या मार्गदर्शनाखाली राबविण्यात आलेल्या या उपक्रमातून गणेशमूर्ती संकलन, पर्यावरणपूरक विसर्जन, निर्माल्य संकलन व त्यावर प्रक्रिया यामुळे पर्यावरण संवर्धनाला चालना मिळाली.
भुदरगड तालुक्यात यंदा 20 हजार 630 गणेशमूर्तींचे संकलन करण्यात आले. यामध्ये 20 हजार 288 घरगुती आणि 342 सार्वजनिक गणेशमूर्तींचा समावेश आहे. गणेशमूर्तींचे पर्यावरणपूरक पद्धतीने विसर्जन करण्याची व्यवस्था करण्यात आली.
गणेशोत्सवादरम्यान सुमारे 6.3 टन निर्माल्य स्वतंत्रपणे संकलित करण्यात आले. त्यावर वैज्ञानिक पद्धतीने प्रक्रिया करून सेंद्रिय खत निर्मितीसाठी त्याचा वापर करण्यात आला. यामुळे सुमारे 2.52 ते 3.15 टन सेंद्रिय खत निर्मिती होण्याची शक्यता आहे.
संकलित गणेशमूर्तींच्या आधारे सुमारे 33 टन प्लास्टर ऑफ पॅरिस (POP) जलस्रोतांमध्ये जाण्यापासून रोखण्यात आल्याचा अंदाज आहे. त्यामुळे नदी, तलाव, विहिरी व ओढ्यांमधील जलप्रदूषण कमी करण्यास मदत झाली.
या उपक्रमात पंचायत समिती, ग्रामपंचायती, ग्रामसेवक, आशा सेविका, अंगणवाडी सेविका, मदतनीस, स्वयंसेवक तसेच नागरिकांनी सक्रिय सहभाग घेतला. श्रद्धेसोबत पर्यावरण संवर्धनाची सांगड घालणारा हा उपक्रम भुदरगड तालुक्यात प्रभावीपणे राबविण्यात आला, अशी माहिती गटविकास अधिकारी डॉ. शेखर जाधव यांनी दिली.
