▪️मुंबई विभागीय माध्यमिक व उच्च माध्यमिक शिक्षण मंडळाची माहिती

मुंबई : इयत्ता बारावी आणि दहावीच्या परीक्षा काळात कॉपीमुक्त अभियानाअंतर्गत सर्व परीक्षा केंद्रावर सीसीटीव्ही कॅमेरे बंधनकारक करण्यात आले आहेत. मुंबई विभागीय माध्यमिक व उच्च माध्यमिक शिक्षण मंडळाअंतर्गत कॅमेरे नसलेल्या केंद्रांची संख्या 58 वरुन 11 इतकी कमी झाली असल्याची माहिती मुंबई विभागीय माध्यमिक व उच्च माध्यमिक शिक्षण मंडळाच्या सचिव ज्योत्स्ना शिंदे-पवार यांनी दिली आहे. ज्या परीक्षा केंद्रावर सीसीटीव्ही कॅमेरे उपलब्ध नाहीत अशा परीक्षा केंद्रांवर केंद्र संचालक व सर्व कर्मचारी अन्य शाळा व कनिष्ठ महाविद्यालयातून नियुक्त करण्यात येणार आहेत.

महाराष्ट्र राज्य माध्यमिक व उच्च माध्यमिक शिक्षण मंडळामार्फत आयोजित करण्यात येणारी उच्च माध्यमिक प्रमाणपत्र (इ. 12 वी) लेखी परीक्षा 10 फेब्रुवारी ते 18 मार्च 2026 या कालावधीत आयोजित करण्यात आली आहे. तसेच माध्यमिक शालान्त प्रमाणपत्र (इ. 10 वी) परीक्षा 20 फेब्रुवारी ते 18 मार्च 2026 या कालावधीत आयोजित करण्यात आलेली आहे.

मुंबई विभागीय मंडळाच्या 5 फेब्रुवारी 2026 रोजी झालेल्या पत्रकार सभेत इ. 12 वीच्या 58 परीक्षा केंद्रांची माहिती कळविण्यात आली होती. तरी केंद्र संचालक, परीरक्षक, शिक्षणाधिकारी व शिक्षण निरीक्षक यांच्या सभा घेऊन त्यात त्यांना कॉपीमुक्त अभियानाच्या अनुषंगाने सर्व परीक्षा केंद्रांवर सीसीटीव्ही कॅमेरे बसविण्याबाबत सूचित करण्यात आले. सद्यस्थितीत बहुतांश परीक्षा केंद्रांनी सीसीटीव्ही कॅमेऱ्यांची  पूर्तता केल्यामुळे सदर परीक्षा केंद्रांच्या संख्येत बदल होऊन कॅमेरे उपलब्ध नसणारी केंद्र संख्या 58 वरुन 11 वर आलेली आहे, अशी माहिती मुंबई विभागीय माध्यमिक व उच्च माध्यमिक शिक्षण मंडळामार्फत कळविण्यात आली आहे.