कोल्हापूर : प्रादेशिक परिवहन कार्यालयामार्फत चारचाकी वाहनांची जुनी नोंदणी मालिका MH-०९-GZ ही लवकरच संपणे अपेक्षित आहे. त्यानंतर या कार्यालयामार्फत नवीन चारचाकी नोंदणी मालिका MH-०9-HE साठी 9 फेब्रुवारी पासून कामकाज सुरु करण्यात येत असून पसंती क्रमांकाचे अर्ज 9 व 10 फेब्रुवारी रोजी सकाळी 9.45 ते दुपारी 3 या वेळेत खिड़की क्रमांक 9 येथे स्विकारण्यात येतील, अशी माहिती प्रादेशिक परिवहन अधिकारी संजीव भोर यांनी दिली आहे.

▪️वाहन नोंदणी क्रमांकाची मागणी करतेवेळी खालील सुचनांचे पालन करावे-
पसंतीचा नोंदणी क्रमांक घेण्यासाठी अर्जासोबत विहित केलेल्या शुल्कानुसार त्या क्रमांकासाठी विहित असलेल्या मुळ रकमेचा Dernand Draft (धनाकर्ष) जोडलेला असणे आवश्यक आहे. धनादेश किंवा पेऑर्डर अर्जासोबत देवू नये. Demand Draft (धनाकर्ष काढताना SBI TRE BRANCH KOLHAPUR GRAS या नावानेच काढलेला असावा. इतर कोणत्याही नावे काढलेला धनाकर्ष स्विकारला जाणार नाही. पसंतीच्या क्रमांकाच्या मूळ रकमेचा एकच Demand Draft (धनाकर्ष) दिनांक 9 व 10 फेब्रुवारी रोजी सकाळी 9.45 ते 3 या वेळेतच कार्यालयात सादर करावा. दि. 10 फेब्रुवारी रोजी सायंकाळी 5 वाजल्यानंतर पसंती क्रमांकाच्या सिंगल डी. डी. व लिलावात गेलेल्या क्रमांकाच्या याद्या प्रसिद्ध केल्या जातील.

धनाकर्षाच्या मागे अर्जदाराने नाव, मोटार वाहनाचा प्रकार, मागणी केलेला नोंदणी क्रमांक, आधार लिंक मोबाईल क्रमांक लिहिणे आवश्यक आहे. एखाद्या नोंदणी क्रमांकासाठी एका पेक्षा जास्त अर्ज प्राप्त झाल्यास त्या क्रमांकाचा लिलाव करण्यात येईल. त्यासाठी अर्जदाराने 11 फेब्रुवारी रोजी जादा रकमेचा एकच स्वतंत्र Demand Draft (धनाकर्ष बंद लिफाफ्यात सकाळी 9.45 ते दुपारी 3.30 या कालावधीत जमा करणे बंधनकारक राहील. एकापेक्षा जास्त अर्ज असलेल्या नोंदणी क्रमांकाचा लिलाव दिनांक 11 फेब्रुवारी रोजी दुपारी 4.30 वाजता कार्यालयाच्या सभागृहात घेण्यात येईल. फक्त अर्जदार व प्राधिकृत प्रतिनिधी यांनाच लिलावास उपस्थित राहण्याची परवानगी देण्यात येईल. लिलावास येताना अर्जदाराने ओळखपत्र आणणे आवश्यक आहे. तसेच प्राधिकृत प्रतिनिधी राहणार असल्यास त्यांच्याकडे प्राधिकारपत्रासह ओळखपत्र असणे अनिवार्य आहे.

आकर्षक क्रमांकाची मागणी करताना आधारला संलग्न असलेलाच मोबाईल नंबर व पत्ता अर्जावर लिहावा. अर्जावर मोबाईल नंबर लिहला नसल्यास आपला कोणताही हक्क आकर्षक क्रमांकावर राहणार नाही. तसेच यादीमध्ये आपले नाव आले तरी आपल्यास आकर्षक क्रमांक मिळणार नाही. एकदा राखून ठेवलेला नोंदणी क्रमांक बदलून देता येत नाही. नोंदणी क्रमांक राखून ठेवलेल्या दिनांकापासून 180 दिवसाच्या आत नोंदणी करून नाही घेतली किंवा मालिका संपल्यानंतर राखून ठेवलेला नोंदणी क्रमांक आपोआप रद्द होईल व शुल्क सरकारजमा होईल. विशिष्ट नोंदणी क्रमांक राखीव ठेवण्यासाठी प्रदान केलेले शुल्क परत करता येणार नाही. वैयक्तिक अर्ज व आकर्षक क्रमांकाच्या फीचा धनाकर्ष वाहनधारकाने फीची खात्री करूनच जमा करावा. जरी नजर चुकीने धनाकर्ष घेतला गेला व नंतर पडताळणी करताना कार्यालयाच्या निदर्शनास आले तर अर्ज प्रक्रियेतून बाद ठरवण्या येईल.

लिलाव प्रकरणी दुसरा डी. डी. सादर करताना मूळ रकमेचा जमा डी. डी. व दुसऱ्यांदा सादर केलेल्या डी.डी.ची रक्कम एकत्रित करुन जादा रक्कम देणाऱ्यास क्रमांक देण्यात येईल. लिलावातील जादा रकमेचा एकच DD स्वीकारण्यात येईल. लिलाव प्रकरणी दुसऱ्यावेळीही समान रक्कमेचा डी.डी. आल्यास किंवा दुसऱ्या वेळी डी.डी. सादर न झाल्यास ज्या व्यक्तीने पहिल्यावेळी प्रथम डी. डी. सादर केला असेल (टोकन क्रमांकानुसार) त्याला हा क्रमांक देण्यात येईल.  सध्या सुरु असलेली चारचाकी वाहन मालिका GZ मधील उर्वरित क्रमांक संपल्यानंतर नवीन मालिका HE फॅन्सी नंबर पोर्टलवर प्रदर्शित करण्यात येईल, अशी माहिती प्रादेशिक परिवहन कार्यालयामार्फत कळविण्यात आले आहे.