कोल्हापूर : मुक्त सैनिक गार्डन, शाहू मार्केट यार्ड प्रवेशद्वार ते रेल्वे महामार्ग दरम्यानचे पथदिवे गेल्या अनेक वर्षांपासून बंद असल्याने नागरिक, प्रवासी, महिला आणि कामगारांना गंभीर समस्यांना सामोरे जावे लागत आहे. या अंधाराचा गैरफायदा घेऊन या परिसरात गुन्हेगारी आणि अनैतिक प्रकार वाढले असून, येथे तात्काळ पथदिवे बसवावेत, अशी मागणी 'भारतीय दलित महासंघ' कोल्हापूर जिल्ह्याच्या वतीने मनपा आयुक्तांकडे एका निवेदनाद्वारे करण्यात आली आहे. प्रशासनाने याकडे दुर्लक्ष केल्यास तीव्र आंदोलन छेडण्यात येईल, असा इशाराही महासंघाने दिला आहे.

भारतीय दलित महासंघाचे कोल्हापूर जिल्हा उपाध्यक्ष  सुरज शिवाजी अवघडे व इतर पदाधिकाऱ्यांच्या स्वाक्षरीने हे निवेदन कोल्हापूर महानगरपालिका प्रशासनाला सादर करण्यात आले. 

या निवेदनात म्हटले आहे की, शाहू मार्केट यार्ड परिसरात विविध भागांतून महिला आणि पुरुष वर्ग रोजगारासाठी व विविध कामांसाठी येत असतात. मात्र, संध्याकाळी घरी परतत असताना या रस्त्यावरील पथदिवे बंद असल्याने त्यांच्या सुरक्षेचा गंभीर प्रश्न निर्माण झाला आहे. हा सर्व प्रकार महानगरपालिका प्रशासनाच्या बेजबाबदारपणामुळे घडत असल्याचा आरोप निवेदनात करण्यात आला आहे.
रस्त्यावर अंधार असल्याचा फायदा घेऊन गुन्हेगार आणि व्यसनी लोक या ठिकाणी दारू पिऊन बसलेले असतात. तसेच रस्त्याच्या बाजूला दारूच्या बाटल्यांचे ढीग साचले असून, चारचाकी गाड्यांमध्ये अश्लील चाळे चालत असल्याचेही निवेदनात नमूद करण्यात आले आहे. या असुरक्षित वातावरणामुळे रात्रीच्या वेळी ये-जा करणाऱ्या कामगार आणि महिला वर्गामध्ये प्रचंड भीतीचे वातावरण आहे. अंधाराचा गैरफायदा घेऊन भविष्यात कोणतीही मोठी अनुचित घटना घडू शकते, अशी भीती व्यक्त केली जात आहे.
या गंभीर समस्येची दखल घेऊन महानगरपालिका प्रशासनाने मुक्त सैनिक गार्डन ते रेल्वे महामार्ग दरम्यान तात्काळ नवीन पथदिवे बसवावेत. जर प्रशासनाने या निवेदनाची गांभीर्याने दखल घेतली नाही आणि भविष्यात येथे कोणताही अनुचित प्रकार घडला, तर त्याला पूर्णपणे मनपा प्रशासन जबाबदार राहील, असे सांगत महासंघाने तीव्र आंदोलनाचा इशारा दिला आहे. या निवेदनाच्या प्रती माहिती व आवश्यक कार्यवाहीसाठी जिल्हा पोलीस प्रमुख (कोल्हापूर) आणि शाहूपुरी पोलीस स्टेशनचे पोलीस निरीक्षक यांनाही सादर करण्यात आल्या आहेत.

 या निवेदनावर सुरज अवघडे, संदिप यादव, कुणाल डोणे, दिगंबर चौगुले, सोमनाथ कुरणे, आयान कुलकर्णी आदींच्या स्वाक्षऱ्या आहेत.