कोल्हापूर : नागाळा पार्क येथील ग्रँड रेसिडेन्सी अपार्टमेंटमधील सामासिक अंतरामध्ये करण्यात आलेल्या अनधिकृत बांधकामावर कोल्हापूर महानगरपालिकेच्या नगररचना, विभागीय कार्यालय क्र.4, अतिक्रमण व अग्निशमन विभागामार्फत आज कारवाई करण्यात आली. 

ग्रँड रेसिडेन्सी अपार्टमेंटमधील सदनिकाधारक स्वप्नील गायकवाड यांनी वेळोवेळी केलेल्या तक्रारी तसेच जनता दरबारामध्ये प्राप्त झालेल्या तक्रारींच्या अनुषंगाने सदर अपार्टमेंटमधील सामासिक अंतरामध्ये विनापरवाना बांधकाम करण्यात आल्याचे निदर्शनास आले होते. याबाबत अपार्टमेंटच्या बांधकाम व्यावसायिकास अनधिकृत बांधकाम काढण्याबाबत नोटीस बजावण्यात आली होती. अनधिकृत बांधकाम काढण्यापूर्वी तक्रारदार व बांधकाम व्यवसायिक यांना सुनावणी घेण्यात आली. नगररचना विभागीय कार्यालयात झालेल्या या सुनावणीमध्ये संबंधितांचे म्हणणे नोंदवून घेण्यात आले. त्यानंतर अंतिम सुनावणीचा आदेश पारित करण्यात आला होता. 

या आदेशाच्या अनुषंगाने आज नगररचना विभाग, कावळा नाका विभागीय कार्यालय क्र. ४, अतिक्रमण विभाग व अग्निशमन विभागाच्या संयुक्त पथकाने आज कारवाई केली. यावेळी सामासिक अंतरामध्ये करण्यात आलेले वॉचमन केबिन, पत्र्याचे शेड, पार्किंगमधील खेळणी तसेच वॉल कंपाऊंड हटविण्यात आले. ही कारवाई एक जेसीबी, एक डंपर व गॅस कटरच्या सहाय्याने करण्यात आली.

या कारवाईवेळी सहायक संचालक नगररचना प्रशांत भोसले, उपशहर रचनाकार पद्मल पाटील, कनिष्ठ अभियंता उमेश बागुल, अतिक्रमण विभाग प्रमुख प्रफुल कांबळे यांच्यासह विभागीय कार्यालयातील कर्मचारी, अग्निशमन विभागाचे कर्मचारी तसेच अतिक्रमण विभागाचे कर्मचारी उपस्थित होते.