कोल्हापूर: नवी मुंबई, नेरूळ येथे संपन्न झालेल्या 'अंजनीबाई चेस अकादमी' आयोजित आंतरराष्ट्रीय फिडे रॅपिड रेटिंग बुद्धिबळ स्पर्धेत कोल्हापूरच्या ऋषिकेश कबनुरकर याने दैदिप्यमान यश संपादन केले आहे. ५२० खेळाडूंच्या अटीतटीच्या लढतीत ऋषिकेशने पाचवा क्रमांक पटकावत कोल्हापूरच्या क्रीडा वैभवात भर घातली आहे.

एकूण ९ फेऱ्यांच्या या स्पर्धेत ऋषिकेशने अत्यंत संयमी खेळ केला. शेवटच्या नवव्या फेरीत विजय मिळवत त्याने ८ गुणांची कमाई केली. या यशाबद्दल त्याला ८,००० रुपये रोख, आकर्षक चषक आणि ८ फिडे मानांकन गुण देऊन गौरविण्यात आले. या स्पर्धेत एकूण ३ लाख रुपयांची बक्षीसे आणि २५० चषक ठेवण्यात आले होते, ज्यात ३१३ मानांकित खेळाडूंसह एकूण ५२० स्पर्धकांनी सहभाग नोंदवला होता. रायगडचा भोईर पारस दिलीप हा ८.५ गुणांसह या स्पर्धेचा विजेता ठरला.

ऋषिकेश हा कोल्हापूरमधील विवेकानंद महाविद्यालयाचा विद्यार्थी असून तो ताराबाई पार्क येथील 'अनुज अकॅडमी'मध्ये बुद्धिबळाचा सराव करतो. त्याच्या या यशाबद्दल संस्थेचे कार्याध्यक्ष अभयकुमार साळुंखे, सचिव शुभांगी गावडे, सी.ई.ओ. कौस्तुभ गावडे आणि प्राचार्य डॉ. सी.बी. पाटील यांनी त्याचे कौतुक केले आहे.

ऋषिकेशला जिमखाना विभाग प्रमुख डॉ. विकास जाधव, ज्युनिअर जिमखाना विभाग प्रमुख प्रा. संतोष कुंडले, प्रा. समीर पठाण, प्रा. प्रशांत कांबळे तसेच कोल्हापूर जिल्हा बुद्धिबळ असोसिएशनचे माजी सेक्रेटरी कृष्णात पाटील यांचे मोलाचे मार्गदर्शन लाभले.