◼️आजअखेर आरोग्य अभियानात ५ हजार ७९४ नागरिकांनी घेतला लाभ

हरोली : सहकारमहर्षी स्व. शामरावअण्णा पाटील यड्रावकर यांच्या पुण्यतिथीनिमित्त आमदार डॉ. राजेंद्र पाटील यड्रावकर सोशल फाउंडेशन आणि शरद आयुर्वेद मेडिकल कॉलेज, हॉस्पिटल अँड रिसर्च सेंटर, यड्राव यांच्या संयुक्त विद्यमाने हरोली येथे आयोजित मोफत आरोग्य व नेत्र तपासणी शिबिरात ४९० नागरिकांची तपासणी करण्यात आली. यामध्ये २९३ नागरिकांची आरोग्य तपासणी, तर १९७ नागरिकांची नेत्र तपासणी करण्यात आली. 

या शिबिरामुळे ग्रामीण भागातील नागरिकांना मोफत आरोग्यसेवेचा लाभ मिळाला. या आरोग्य शिबिराला अजय पाटील यड्रावकर यांनी भेट दिली.
स्व. शामरावअण्णा पाटील यड्रावकर यांच्या पुण्यतिथीनिमित्त शिरोळ तालुक्यातील विविध गावांमध्ये मोफत आरोग्य व नेत्र तपासणी अभियान राबविण्यात येत आहे. या अभियानाच्या माध्यमातून नागरिकांना आरोग्य तपासणीची सुविधा उपलब्ध करून देण्याबरोबरच आरोग्याबाबत जागृती निर्माण करण्याचा प्रयत्न केला जात आहे. ग्रामीण भागातील नागरिकांना वेळेत आरोग्यविषयक तपासणी करून घेता यावी, या उद्देशाने विविध गावांमध्ये शिबिरांचे आयोजन करण्यात येत आहे.

हरोली येथील शिबिरात ४९० नागरिकांची तपासणी झाल्याने या अभियानांतर्गत आजअखेर तपासणी झालेल्या नागरिकांची एकूण संख्या ५ हजार ७९४ झाली आहे. नांदणी येथे झालेल्या शिबिरात ६१२ नागरिकांची तपासणी करण्यात आली होती. त्यानंतर हरोली येथील शिबिरात ४९० नागरिकांनी लाभ घेतल्याने अभियानाला नागरिकांचा चांगला प्रतिसाद मिळत आहे.

हरोली येथील शिबिरावेळी सरपंच तानाजी माने, भरत चौगुले, रामगोंडा पाटील, शांतिनाथ पाटील, राजकुमार कांबळे, रोहित कांबळे, स्वप्नील पाटील, नेमिनाथ चौगुले, मनोज चौगुले, प्रशांत चौगुले, गोविंद गुजरे, जबुकुमार चौगुले, राजगोंडा पाटील, अशोक मेस्त्री, रावसाहेब पाटील, तेजस पाटील, जगदीश जाधव, शिकंदर मुजावर, मारुती साळोखे यांच्यासह ग्रामस्थ उपस्थित होते.