कोल्हापूर : ग्राहकांची फसवणूक रोखण्यासाठी आणि ग्राहकांना योग्य प्रमाणात व योग्य किमतीत वस्तू मिळाव्यात यासाठी वैध मापन शास्त्र विभागामार्फत बाजारातील वजने-मापे, इलेक्ट्रॉनिक व मेकॅनिकल काटे, तसेच पेट्रोल पंपांची नियमानुसार पडताळणी व मुद्रांकन केले जाते. तसेच आवेष्टित वस्तूंची छापील कमाल किरकोळ किंमत (MRP) पेक्षा अधिक दराने विक्री करणाऱ्या व्यापाऱ्यांवर दंडात्मक कारवाईही केली जाते.

जिल्ह्यात काही ठिकाणी दूध, शीतपेये, कोल्ड्रिंक्स आदी वस्तूंवर 'कूलिंग चार्ज', 'फ्रिज चार्ज' किंवा तत्सम कारणे देत एमआरपीपेक्षा अधिक दर आकारला जात असल्याच्या तक्रारी राष्ट्रीय उपभोक्ता हेल्पलाइनमार्फत प्राप्त होत आहेत. विशेषतः लहान दुकानांमध्ये खरेदीची पावती न दिल्यामुळे ग्राहकांकडे अतिरिक्त आकारणीचा पुरावा राहत नाही आणि तक्रार करणे कठीण होते.

एमआरपीपेक्षा अधिक दराने वस्तूंची विक्री करणे कायद्याने बेकायदेशीर असून ग्राहकांनी अशा प्रकारांबाबत तक्रार करण्याचे आवाहन करण्यात आले आहे.
तक्रारींसाठी ग्राहकांनी राष्ट्रीय उपभोक्ता हेल्पलाइनच्या टोल फ्री क्रमांक 1800 11 1915, ई-मेल acimkolhapur@yahoo.in, अथवा उप नियंत्रक, वैध मापन शास्त्र विभाग, 1845, सी-वॉर्ड, हत्तीमहल रोड, मटन मार्केटजवळ, कोल्हापूर – 416002, दूरध्वनी 0231-2547567 येथे संपर्क साधावा, असे आवाहन उप नियंत्रक ज्योती पाटील यांनी केले आहे.