कोल्हापूर : शहरातील महापालिका चौकात भटक्या कुत्र्याने चावा घेतलेल्या तरुणीचा रेबीजची लागण होऊन मृत्यू झाला. सृष्टी सुनील शिंदे (वय २१, रा. नागाळा पार्क, कोल्हापूर) असे तिचे नाव आहे. सृष्टी शिंदे हिने रेबीज प्रतिबंधक लसही घेतली होती. मात्र तिच्या मृत्यूमुळे कुटुंबाला मोठा धक्का बसला आहे. शहरातील भटक्या कुत्र्यांची संख्या वाढत असून नागरिकांना त्रास सहन करावा लागत आहे.

 ३ फेब्रुवारीला सृष्टी खरेदीसाठी महाद्वार रोडला गेली होती. तेथून परत येताना ती महापालिका चौक परिसरात थांबली होती. यावेळी भटक्या श्वानाने तिच्यासह २० हून अधिक नागरिकांचा चावा घेतला होता. सृष्टी शिंदे हिने रेबीज प्रतिबंधक लसही घेतली होती. त्यानंतर मधल्या काळात तिची तब्येतही चांगली होती. मात्र, दोन दिवसांपूर्वी अचानक ताप आल्याने तिला पुन्हा सीपीआर रुग्णालयात दाखल केले असता, रेबिज झाल्याचे निदान झाले.

  उपचार सुरू असतानाच सोमवारी रात्री तिचा मृत्यू झाला.सृष्टी शिंदे हिचा मृतदेह घरी न नेता प्रतिबंधात्मक खबरदारी घेत अंत्यसंस्कार करण्यात आले.  तिच्या संपर्कात आलेल्या सर्वांचीच आरोग्य तपासणी करण्यात येणार आहे. भटके कुत्रे ज्या २० जणांना चावले होते त्यांच्या प्रकृतीवरही लक्ष ठेवले जात आहे.