![](_SMPNews/u/pos/202407/1000876516--800.jpg)
कोल्हापूर : करवीर तालुक्यातील वडणगे येथे शेतात पडलेल्या विजेच्या तारेला स्पर्श होऊन विक्रम साखळकर (वय ३३)या तरूण शेतकऱ्याचा मृत्यू झाला.आज सायंकाळच्या सुमारास ही घटना घडली.
याबाबत अधिक माहिती अशी की, करवीर तालुक्यातील वडणगे येथील साखळकर मळ्यात राहणारा विक्रम आज सायंकाळी गवताला लागवड टाकण्यासाठी शेतात गेला होता. त्याचवेळी शेतात तुटून पडलेली महावितरणची विद्युत तार विक्रमला न दिसल्याने या तारेला स्पर्श झाल्यानं त्याचा जागीच मृत्यू झाला.
विक्रमचे सात वर्षापूर्वी लग्न झाले होते. त्याला पाच वर्षाची एक मुलगी असून चार दिवसांपूर्वीच त्याला दुसरी मुलगी झाली आहे. विक्रमच्या अपघाती मृत्यूमुळे सर्वत्र हळहळ व्यक्त होत आहे.
गेल्या आठवड्यामध्ये कोपार्डे येथील दोघा सख्या भावाचा विद्युत तारेला स्पर्श होऊन मृत्यू झाला होता. ही घटना ताजी असतानाच आज हा प्रकार घडला आहे. यामुळे चिंता व्यक्त करण्यात येत असून शेतकऱ्यांनी शेतामध्ये जाताना खबरदारी घेण्याची गरज आहे.