अतिग्रे : इंटरनॅशनल टेनिस फेडरेशन मार्फत लखनऊ या ठिकाणी नुकत्याच झालेल्या अठरा वर्षाखालील मुलींच्या टेनिस स्पर्धेत ऐश्वर्या जाधवने सिंगल व डबल्स या दोन्ही खेळ प्रकारांमध्ये उपविजेतेपद पटकावले.
ऐश्वर्या जाधव संजय घोडावत इंटरनॅशनल स्कूलची विद्यार्थिनी आहे. यापूर्वीही टेनिस खेळामध्ये तिने राष्ट्रीय व आंतरराष्ट्रीय स्तरावर अनेक सामने जिंकले आहेत. नुकत्याच लखनऊ या ठिकाणी झालेला सिंगल व डबल या दोन्ही खेळ प्रकारामधील अंतिम सामने अतिशय रंगतदार झाले. दोन्ही सामन्यात उपविजेतेपद प्राप्त करत ऐश्वर्याने भारत देशाचे व संजय घोडावत इंटरनॅशनल स्कूलचे नाव आंतरराष्ट्रीय स्तरावर चमकवले. विम्बल्डन खेळाडू, कोल्हापूरची कन्या ऐश्वर्या जाधव अशी ओळख निर्माण केलेल्या ऐश्वर्याचे टेनिस खेळावरील प्रभुत्त्व वाखाणण्याजोगे आहे. तिला अल्टवोल- अलेक्झांडर वास्के टेनिस अकॅडमी अहमदाबाद येथील प्रशिक्षक श्रीमल भट यांचे मार्गदर्शन लाभले.
संजय घोडावत समूहाचे अध्यक्ष संजय घोडावत , विश्वस्त विनायक भोसले, संचालिका-प्राचार्या सस्मिता मोहंती यांनी या यशाबद्दल ऐश्वर्याचे कौतुक केले.