गुजरात : बडोदा येथे २० ते २४ एप्रिल दरम्यान पार पडलेल्या शक्ती चषक ध्रुवीक चेस अकादमी आयोजित आंतरराष्ट्रीय फिडे क्लासिक रेटिंग बुद्धिबळ स्पर्धेत कोल्हापूरच्या ऋषिकेश आणि शर्वरी कबनूरकर यांनी घवघवीत यश संपादन केले आहे. ऋषिकेश कबनूरकर याने नवव्या फेरीत प्रतीक अबी याच्यावर विजय मिळवत एकूण ७ गुणांची कमाई केली. या कामगिरीमुळे त्याने १८०० रेटिंग पेक्षा कमी गटात प्रथम क्रमांक पटकावून १०,००० रुपये रोख आणि चषक आपल्या नावे केला. या स्पर्धेतून त्याने २५ फिडे मानांकन गुणांचीही कमाई केली आहे. एकूण ३६४ खेळाडूंनी सहभाग नोंदवलेल्या या स्पर्धेत गुजरातच्या अनाद कर्तव्याने ८.५ गुणांसह अजिंक्यपद मिळवले.

याच स्पर्धेत ऋषिकेशची बहीण शर्वरी कबनूरकर हिनेही महिला गटात चमकदार कामगिरी करत प्रथम क्रमांक मिळवला. तिने कॅनडाच्या खेळाडूविरुद्धची लढत बरोबरीत सोडवत साडेपाच गुणांची कमाई केली आणि ३४ फिडे मानांकन गुण मिळवले. तिला ३००० रुपये रोख आणि चषक देऊन गौरविण्यात आले. शर्वरी ही केआयटी कॉलेजची विद्यार्थिनी असून ऋषिकेश स्वामी विवेकानंद महाविद्यालयाचा विद्यार्थी आहे. 

हे दोन्ही खेळाडू दाभोळकर कॉर्नर येथील अनुज अकॅडमीमध्ये सराव करतात. त्याला शिक्षण संस्थेचे कार्याध्यक्ष अभयकुमार साळुंखे, सचिव शुभांगी गावडे, संस्थेचे सी.ई.ओ. कौस्तुभ गावडे, प्राचार्य डॉ. आर. आर. कुंभार, जिमखाना विभाग प्रमुख डॉ. विकास जाधव, ज्युनिअर जिमखाना विभाग प्रमुख प्रा. संतोष कुंडले, प्रा. समीर पठाण, प्रा. प्रशांत कांबळे,  कोल्हापूर जिल्हा बुद्धिबळ असोसिएशन माजी सेक्रेटरी कृष्णात पाटील यांचे मार्गदर्शन लाभले