नवी दिल्ली : गँगस्टर लॉरेन्स बिश्नोई टोळीने पिनिपेग शहरात भारतातून फरार असलेला गँगस्टर सुखदुल सिंग उर्फ सुखा दुनुके याच्या हत्येची जबाबदारी स्वीकारली आहे. लॉरेन्स बिश्नोईच्या फेसबुक प्रोफाईलवरून एक पोस्ट करण्यात आली असून त्यात कॅनडातील हत्येची जबाबदारी घेण्यात आली आहे. यासोबतच इतर गुंडांनाही या पोस्टमध्ये धमकी देण्यात आली आहे. हत्या, हत्येचा प्रयत्न आणि खंडणी अशा अनेक गंभीर गुन्ह्यात तो पंजाब पोलिसांना हवा होता.
पंजाब पोलिसांच्या माहितीनुसार, सुक्खा २०१७ मध्ये कनाडाला पळून गेला होता. तिथून तो खंडणीचं रॅकेट चालवत होता. दहशतवादी कारवायांशी संबंधित प्रकरणांत एनआयएने मंगळवारी ४० हून अधिक कुख्यात गुंडांची यादी प्रसिद्ध केली होती. त्यात सुक्खाचाही समावेश होता. सुक्खा हा बांबिहा टोळीशी संबंधित होता. लॉरेन्स बिश्नोई आणि गोल्डी ब्रार टोळीशी त्याचं वैर होतं, अशी माहितीही पोलिसांनी दिली. पंजाबच्या मालियान गावात २०२२ मध्ये कबड्डी सामन्यांदरम्यान कबड्डीपटू संदीप नगल अंबिया याची हत्या झाली होती. या हत्येत सुक्खा हा आरोपी होता.
सुक्खा दुनुकेच्या हत्येची जबाबदारी गँगस्टर लॉरेन्स बिश्नोई टोळीनं घेतली आहे. सोशल मीडियावरील पोस्टच्या माध्यमातून टोळीनं सुक्खाच्या हत्येची जबाबदारी घेतली आहे. या पोस्टमधून टोळीनं आणखी काही कुख्यात गुंडांना धमकी दिली आहे. कितीही पळा, तुमच्या पापाची शिक्षा मिळणारच, असं या पोस्टमध्ये म्हटलं आहे.