मिरज : मिरज येथील कृष्णाघाटावर दुर्गा माता देवी मूर्तीचे विसर्जन करते वेळी तिघेजण पाण्याच्या प्रवाहात बुडाले. मात्र दोघांना सुखरूप बाहेर काढण्यात यश आले. बुडालेला एकजण अजूनही बेपत्ता आहे. अमित गायकवाड (वय १८ रा. सुभाषनगर) असे बुडालेल्या युवकाचे नाव आहे.रविवारी संध्याकाळपर्यंत त्याचा शोध घेण्यात आला.पण तो सापडला नाही.
सुभाषनगर येथील अंबिकानवरात्र उत्सव मंडळाच्या देवीच्या मूर्तीचे विसर्जन करण्यास सर्वजण शनिवारी संध्याकाळी आले होते. मूर्ती विसर्जन करण्यासाठी अमित गायकवाड (वय १८) हा सुद्धा कार्यकर्त्यांच्या समवेत पाण्यात उतरला. पाण्याचा अंदाज न आल्याने तो गटांगळ्या खाऊ लागला. त्याला वाचवण्यास लक्ष्मण मोरे (वय ४५), अमोल गायकवाड (वय १७) यांनी उड्धा घेतल्या. तिघेजण बुडत आहेत म्हटल्यावर आयुष हेल्प लाईन आपत्कालीन पथकाचे सदस्य योगेश आनंदे यांनी तात्काळ पाण्यात उडी घेतली.
लक्ष्मण मोरे आणि अमोल गायकवाड या दोघांना त्यांनी वाचवले. परंतु अमित गायकवाड पाण्याच्या प्रवाहात बराच लांब गेला. नदीपात्रामध्ये शोध मोहीम रात्री उशिरा पर्यंत सुरू होती. मात्र अमित आढळून आला नाही. रविवारी सकाळी पुन्हा शोध मोहीमेस सुरुवात करण्यात आली. रविवारी संध्याकाळ पर्यंत अमित आढळून आला नव्हता. शोध मोहीमेसाठी आयुष हेल्पलाइन टीम तसेच अग्रिशामक दल शर्थीचे प्रयत्न करीत आहेत.
* रूई बंधाऱ्यातून युवक वाहून गेला
हुपरी : दुर्गामाता मूर्तीचे विसर्जन करताना माणगाव ( ता. हातकणगंले) योथील प्रकाश शिवाजी परीट (वय ३५) हा युवक वाहून गेला.
यामध्ये अन्य सहाजण बचावले असून ही घटना शनिवारी रात्री साडेअकराच्या दरम्यान रूई बंधारा येथे घडली. बोटीच्या सहाय्याने दिवसभर शोधमोहीम सुरू होती. मात्र मृतदेह अद्याप सापडला नाही.
माणगाव येथील गांधी चौक तरूण मंडळाच्या वतीने शनिवारी दुर्गामाता मूर्तीचे विसर्जन करण्याकरिता रूई येथील पंचगंगा नदीवरील बंधारा नजीक मंडळाचे वीस तीस कार्यकर्ते गेले होते. मूर्ती घेवून आठ कार्यकर्ते नदीपात्रात उतरले. यावेळी काही कार्यकर्ते नदीत कोसळले.पाण्याला प्रचंड वेग असल्याने प्रकाश परीट हा वाहून गेला.