![](_SMPNews/u/pos/202407/1000914365--800.jpg)
कोल्हापूर : कबनूर (ता. हातकणंगले) येथील पाणीपुरवठा पाइपलाइनचा कार्यारंभ आदेश काढण्यासाठी ९ हजार रुपयांची लाच घेताना ग्रामविकास अधिकारी गणपत धनाजी आदलिंग (वय ५७, रा. मराठा कॉलनी, कसबा बावडा, कोल्हापूर) हा लाचलुचपत प्रतिबंध विभागाच्या जाळ्यात सापडला. ही कारवाई सोमवारी (दि. २२) दुपारी चारच्या सुमारास जिल्हा परिषदेतील ग्रामपंचायत विभागात झाली. आदलिंग याच्या विरोधात ठेकेदाराने तक्रार केली होती.
लाचलुचपत प्रतिबंधक विभागाचे निरीक्षक बापू साळुंके यांनी दिलेल्या माहितीनुसार, तक्रारदार हे ठेकेदारआहेत. निविदेनुसार त्यांना कबनूर येथील वाढीव पाइपलाइनचे काम मिळाले होते. २ लाख ४० हजार रुपयांच्या कामांचा आदेश काढावा, यासाठी ते ग्रामविकास अधिकारी गणपत आदलिंग याला भेटले. त्यावेळी आदलिंग याने आदेश काढण्यासाठी ९ हजार रुपयांच्या लाचेची मागणी करून सोमवारी दुपारी जिल्हा परिषदेतलाचेची रक्कम घेऊन बोलावले. दरम्यान, याबाबत ठेकेदारांनी लाचलुचपत प्रतिबंधक विभागात तक्रार दिली. निरीक्षक साळुंके यांनी तक्रारीची पडताळणी करून सोमवारी दुपारी जिल्हा परिषदेत सापळा रचला या सापळ्यात आदलिंग हा ९ हजार रुपयांची लाच घेताना सापडला. पोलिसांनी त्याला अटक करून शाहूपुरी पोलिस ठाण्यात गुन्हा दाखल केला.
लाचलुचपत प्रतिबंधक विभागाचे निरीक्षक बापू साळुंके यांच्या मार्गदर्शनाखाली ही कारवाई करण्यात आली यामध्ये मध्ये पो.हे.कॉ. विकास माने, पो.हे.कॉ. सुनील घोसाळकर, पो. ना. सचिन पाटील, पो.कॉ. संदीप पवार, ला.प्र.वि.कोल्हापूर यांचा सहभाग होता.