नवी दिल्ली : लोकसभा निवडणुकांनंतर एनडीए सरकारचा शपथविधी सोहळा आज सायंकाळी पार पडणार असून नरेंद्र मोदी तिसऱ्यांदा पंतप्रधान म्हणून शपथ घेतील. आजच्या शपथविधी सोहळ्यात एनडीएमधील घटकपक्षांचे नेते कॅबिनेट मंत्रीपदाची शपथ घेतील. 

महाराष्ट्रात राष्ट्रवादी काँग्रेस पक्ष आणि शिवसेना शिंदे गटाला प्रत्येकी एक मंत्रीपद देण्यात येणार आहे. राष्ट्रवादीकडून प्रफुल पटेल तसेच शिवसेना शिंदे गटाकडून खासदार प्रतापराव जाधव यांना मंत्रीपदासाठी फोन आला आहे. तसेच भाजपच्या खासदार रक्षा खडसे, पियुष गोयल, नितीन गडकरी, यांनाही मंत्रीपदाची लॉटरी लागली आहे.

एनडीए सरकारमध्ये किंगमेकर ठरलेल्या चंद्राबाबू नायडू यांच्या TDP पक्षाचे राममोहन नायडू कॅबिनेट मंत्री तर पेम्मासानी चंद्रशेखर हे राज्यमंत्री म्हणून शपथ घेणार आहेत. त्याचबरोबर बिहारचे माजी मुख्यमंत्री जितनराम मांझी हे सुद्धा नरेंद्र मोदींच्या मंत्रीमंडळात शपथ घेतील.

RLD प्रमुख जयंत चौधरी आणि अपना दलाच्या प्रमुख अनुप्रिया पटेल यांनाही दिल्लीतून फोन आला आहे. त्याच बरोबर अर्जुनराम मेघवाल, कर्नाटकचे माजी मुख्यमंत्री एचडी कुमार स्वामी, प्रल्हाद जोशी, भाजपचे खासदार सर्वानंद सोनेवाल, मध्यप्रदेशचे माजी मुख्यमंत्री शिवराज सिंह चौहान यांना मंत्रीपदाची संधी देण्यात आली आहे. तसेच मध्यप्रदेशचे नेते ज्योतिरादित्य सिंधिया यांनाही पुन्हा मंत्रीपदाची लॉटरी लागली आहे.