मुंबई: राज्य शासनाने गुरुवारी प्रशासकीय सेवेतील वरिष्ठ अधिकाऱ्यांच्या बदल्यांचे आदेश जारी केले असून, यामध्ये कोल्हापूरचे जिल्हाधिकारी अमोल येडगे यांची बदली छत्रपती संभाजीनगर महानगरपालिकेच्या आयुक्तपदी करण्यात आली आहे. सामान्य प्रशासन विभागाचे सहसचिव सुभाष उमराणीकर यांच्या स्वाक्षरीने हे आदेश निर्गमित करण्यात आले आहेत. अमोल येडगे हे आता श्री. जी. श्रीकांत यांची जागा घेतील. विशेष म्हणजे, अमोल येडगे यांच्या रिक्त जागी कोल्हापूरचे नवीन जिल्हाधिकारी म्हणून डॉ. विजय राठोड (भाप्रसे) यांची नियुक्ती करण्यात आली आहे.

शासकीय आदेशानुसार, अमोल येडगे यांनी आपल्या जिल्हाधिकारी पदाचा कार्यभार डॉ. विजय राठोड यांच्याकडे सोपवून छत्रपती संभाजीनगरमधील आपला नवीन पदभार त्वरित स्वीकारण्याचे निर्देश दिले आहेत. या बदली प्रक्रियेनंतर संबंधित अधिकाऱ्यांनी 'सुप्रिमो' प्रणालीवर आपली माहिती अद्ययावत करावी आणि गोपनीय अहवाल विहित वेळेत सादर करावेत, अशा सूचनाही देण्यात आल्या आहेत. तसेच नवीन पदस्थापनेत 'ई-ऑफिस' आणि 'e-HRMS' प्रणालीचा प्रभावी वापर करण्यावर भर देण्यास सांगण्यात आले आहे. या बदल्यांची प्रत मुख्यमंत्री आणि उपमुख्यमंत्री कार्यालयासह संबंधित विभागीय आयुक्तांना माहितीसाठी पाठवण्यात आली आहे. या फेरबदलामुळे छत्रपती संभाजीनगर आणि कोल्हापूर या दोन्ही महत्त्वाच्या शहरांना आता नवे प्रशासकीय नेतृत्व मिळाले आहे.