कोल्हापूर : गेल्या १५ वर्षांहून अधिक काळ सराफ आणि सुवर्ण कारागिरांच्या हितासाठी कार्यरत असलेल्या 'कोल्हापूर जिल्हा सराफ सुवर्णकार संघा'च्या वतीने येत्या २८ मार्च रोजी भव्य जिल्हास्तरीय मेळाव्याचे आयोजन करण्यात आले आहे. मार्केट यार्डातील लोटस बँक्वेट हॉल येथे सकाळी ११ ते २ या वेळेत हा मेळावा संपन्न होईल, अशी माहिती संघाचे जिल्हाध्यक्ष आणि नामवंत सराफ अमोल ढणाल यांनी पत्रकार परिषदेत दिली. 

फत्तेसिंग रांका आणि सुरेंद्र पुरवंत यांच्या मार्गदर्शनाखाली स्थापन झालेल्या या संघाचे सध्या कोल्हापुरात अडीच हजार सदस्य आहेत.

या मेळाव्याचे मुख्य आकर्षण म्हणजे नाशिकचे नामवंत सराफ अनिल दंडे आणि सुरेंद्र पुरवंत यांचे प्रमुख मार्गदर्शन लाभणार आहे. मेळाव्यामध्ये सध्या सराफ व्यवसायासमोर उभी असलेली गंभीर आव्हाने, जसे की सोने-चांदीच्या दरातील अनपेक्षित वाढ, व्यावसायिकांवर होणारे प्राणघातक हल्ले, वाढत्या चोऱ्या आणि मोठ्या पेढ्यांच्या स्पर्धेमुळे अडचणीत आलेले छोटे व्यावसायिक, या विषयांवर सखोल विचारमंथन केले जाणार आहे. याशिवाय, आगामी आर्थिक वर्षाचे नियोजन आणि 'स्टॉक मॅनेजमेंट' या तांत्रिक विषयांवरही चर्चा होईल.

 मेळाव्यात मंजूर करण्यात आलेले महत्त्वाचे ठराव केंद्र आणि राज्य सरकारकडे पुढील अंमलबजावणीसाठी पाठवले जाणार आहेत. या पत्रकार परिषदेला पांडुरंग कुंभार, अमर गोडबोले, अविनाश मुखरे आणि सचिन देवरुखकर उपस्थित होते.