कोल्हापूर  : कोल्हापूरमधील बहुचर्चित वाशी नाका फायरिंग प्रकरणातील मुख्य सूत्रधार गणेश रमेश खाडे यास स्थानिक गुन्हे अन्वेषण शाखेच्या पथकाने कागल येथून बेड्या ठोकल्या आहेत. १६ जुलै २०२६ रोजी वाशी नाका सिग्नल ते फुलेवाडी रिंगरोडवरील स्टार लोकल मार्केटजवळ सुरज हणमंत साखरे हा त्याच्या ऑफिस गाळ्याच्या कामाची पाहणी करून बाहेर येत असताना, दोन अनोळखी इसमांनी त्याच्यावर जीवे मारण्याच्या उद्देशाने अग्निशस्त्राने फायरींग करून गंभीर जखमी केले होते. याप्रकरणी आशुतोष अमित नाईक यांच्या फिर्यादीवरून करवीर पोलीस ठाण्यात गुन्हा दाखल करण्यात आला होता.

गुन्ह्याचे गांभीर्य लक्षात घेऊन पोलीस अधीक्षक नीलोत्पल यांनी या प्रकरणाचा तपास स्थानिक गुन्हे शाखेचे पोलीस निरीक्षक सुशांत चव्हाण यांच्याकडे सुपूर्द केला होता. तपासादरम्यान पोलिसांनी यापूर्वी ५ आरोपींना अटक करून त्यांच्याकडून गुन्ह्यात वापरलेली हत्यारे, काडतुसे आणि वाहने हस्तगत केली होती. सखोल तपासात लक्षतीर्थ वसाहत येथील गणेश रमेश खाडे यानेच सुरज साखरेच्या खुनासाठी सुपारी दिल्याचे निष्पन्न झाले.

आरोपी गणेश खाडे हा कागल येथे येणार असल्याची गोपनीय माहिती पोलीस अंमलदार संदीप पाटील यांना मिळाल्यानंतर, पोलिसांनी तत्काळ कागल येथे सापळा रचून त्यास ताब्यात घेतले. प्राथमिक तपासात त्याने गुन्हा केल्याची कबुली दिली असून, या प्रकरणी पुढील कायदेशीर कारवाई सुरू आहे. ही यशस्वी कारवाई पोलीस अधीक्षक नीलोत्पल, अपर पोलीस अधीक्षक अण्णासाहेब जाधव, उपविभागीय पोलीस अधिकारी आप्पासाहेब पवार यांच्या मार्गदर्शनाखाली पोलीस निरीक्षक सुशांत चव्हाण, संदीप पाटील, वसंत पिंगळे, अनिकेत मोरे, अरविंद पाटील आणि सागर चौगले यांच्या पथकाने पार पाडली आहे.