नवी दिल्ली : रशियाच्या पूर्वेकडील कामचटका भागात बुधवारी सकाळी ८.७ रिश्टर स्केल तीव्रतेचा भूकंप झाला. या नैसर्गिक आपत्तीचा परिणाम अमेरिका आणि जपानसह काही देशांमध्ये जाणवत आहे. भूकंपानंतर रशियन किनाऱ्यावर मोठ्या त्सुनामीच्या लाटा उसळल्या, ज्यांची उंची १३ फूटांपर्यंत नोंदवली गेली. परिसरातून लोकांना बाहेर काढण्याचे काम सुरू करण्यात आले आहे.

कामचटकातील भूकंपानंतर, रशियन सरकारचे मंत्री लेबेदेव यांनी लोकांना पाण्याच्या क्षेत्रांपासून दूर राहण्याचे आवाहन केले आहे. त्याच वेळी, अमेरिकेच्या त्सुनामी चेतावणी यंत्रणेने पुढील 3 तासांत त्सुनामी लाटांचा इशारा जारी केला आहे. असे म्हटले जात आहे की या काळात वायव्य हवाईयन बेटे आणि रशियन किनाऱ्यांजवळ लाटांची उंची 10 फूटांपर्यंत जाऊ शकते.

तसेच, ३ फूट उंचीच्या त्सुनामी लाटा फिलीपिन्स, कोसरे, मार्शल बेटे, पलाऊ येथे पोहोचू शकतात. याशिवाय, १ फूट पेक्षा जास्त उंचीच्या लाटा दक्षिण कोरिया, उत्तर कोरिया आणि तैवानच्या किनाऱ्यावर पोहोचण्याची शक्यता आहे. जपानच्या हवामान विभागाने असा इशारा दिला आहे की स्थानिक वेळेनुसार दुपारी १ वाजता ३.२८ फूट उंचीच्या त्सुनामी लाटा किनारपट्टीच्या भागात पोहोचू शकतात.

कामचटकाचे गव्हर्नर व्लादिमीर सोलोडोव्ह यांनी एका व्हिडिओ संदेशात म्हटले आहे की, 'आजचा भूकंप खूप गंभीर आणि शक्तिशाली होता.' त्यांनी सांगितले की, सध्या भूकंपामुळे जीवितहानी झाल्याचे वृत्त नाही. त्सुनामीच्या इशाऱ्यानंतर, सखालिन प्रदेशातील सेवेरो कुरिल्स्क या छोट्या शहरातून लोकांना बाहेर काढण्याचे काम सुरू करण्यात आले आहे.

अमेरिकन भूगर्भीय सर्वेक्षणानुसार, भूकंप १९.३ किमी खोलीवर झाला, ज्याचा केंद्रबिंदू अवाचा खाडीवर असलेल्या पेट्रोपाव्लोव्स्क-कामचत्स्की या किनारी शहराच्या पूर्व-आग्नेयेस १२५ किमी अंतरावर होता. अमेरिकन एजन्सीने सुरुवातीला त्याची तीव्रता ८ रिश्टर स्केल इतकी नोंदवली होती, परंतु नंतर ती ८.७ रिश्टर स्केल इतकी नोंदवण्यात आली.