कोल्हापूर  : चंदगड तालुक्यातील उमगाव पैकी माळीवाडी परिसरात एक धक्कादायक घटना उघडकीस आली आहे. गेल्या पाच महिन्यांपासून बेपत्ता असलेल्या ७९ वर्षीय वृद्धाचा सांगाडा गुरुवारी स्थानिक शिवारात आढळून आला. धोंडीबा विठोबा सावंत असे या मृत वृद्धाचे नाव असून, ते माळीवाडी गावचे रहिवासी होते. या घटनेमुळे संपूर्ण परिसरात हळहळ व्यक्त केली जात आहे.

मिळालेल्या माहितीनुसार, धोंडीबा सावंत हे ११ डिसेंबर रोजी सकाळी साडे नऊच्या सुमारास शेताकडे जातो असे सांगून घरातून बाहेर पडले होते. मात्र, त्यानंतर ते परतलेच नाहीत. याप्रकरणी मनोहर धोंडीबा सावंत यांनी चंदगड पोलीस ठाण्यात ते बेपत्ता असल्याची तक्रारही दाखल केली होती. तेव्हापासून पोलीस आणि नातेवाईक त्यांचा शोध घेत होते, मात्र त्यांच्याबाबत कोणतीही माहिती मिळत नव्हती.

पाच महिन्यानंतर, गुरुवारी १४ तारखेला माळीवाडी येथील शेंडा टेक नावाच्या शेतात मानवी सांगाडा आढळून आल्याने खळबळ उडाली. तपासणीअंती हा सांगाडा बेपत्ता धोंडीबा सावंत यांचाच असल्याचे निष्पन्न झाले. या घटनेची रीतसर माहिती विक्रम विठोबा सावंत यांनी चंदगड पोलिसांना दिली असून, पोलीस हेड कॉन्स्टेबल ए. बी. नाईक या प्रकरणाचा अधिक तपास करत आहेत. पाच महिन्यांपासून बेपत्ता असलेल्या व्यक्तीचा अशा प्रकारे अंत झाल्याने माळीवाडी गावावर शोककळा पसरली आहे.