वारणानगर : विधी शिक्षणातून प्राप्त होणाऱ्या ज्ञानाचा आणि कौशल्यांचा उपयोग विद्यार्थ्यांनी समाजातील विविध समस्यांचे निराकरण करण्यासाठी करावा, असे आवाहन वारणा विद्यापीठाचे कुलगुरू प्रा. डॉ. डी. टी. शिर्के यांनी केले.

वारणा विद्यापीठाच्या वारणा स्कूल ऑफ लॉच्या वतीने आयोजित इंडक्शन प्रोग्राममध्ये प्रमुख पाहुणे म्हणून ते बोलत होते. विद्यार्थ्यांनी केवळ परीक्षा आणि गुणांपुरते मर्यादित न राहता, डिजिटल तंत्रज्ञानाचा प्रभावी वापर करून आपली व्यावसायिक कौशल्ये विकसित करावीत, असे त्यांनी सांगितले.

विधी शिक्षण घेताना विद्यार्थ्यांनी कायद्यांमधील सुधारणा, गाजलेले न्यायालयीन खटले (Celebrity Cases) आणि न्यायालयीन कामकाजाचे थेट प्रक्षेपण (Live Streaming) यांचा अभ्यास करावा. तसेच, लीगल क्लिनिक सेंटर आणि मूट कोर्टच्या माध्यमातून स्थानिक समस्यांचा कायदेशीर दृष्टिकोनातून अभ्यास करून त्यावर उपाय शोधावेत, असे मार्गदर्शन त्यांनी केले.

कार्यक्रमाचे स्वागत व प्रास्ताविक प्रा. भालचंद्र मोटे यांनी केले. प्रमुख पाहुण्यांची ओळख प्रा. सुरेखा यादव यांनी करून दिली. प्रा. तिवारी यांनी आभार मानले, तर किरण गुजर आणि श्रूती गोलगिरे यांनी सूत्रसंचालन केले. याप्रसंगी, कुलसचिव, डॉ. आर. बी. पाटील, समन्वयक, डॉ. आर. बी. बसनाईक व प्राध्यापक उपस्थित होते 

या उपक्रमास श्री वारणा विविध उद्योग व शिक्षण समूहाचे अध्यक्ष, डॉ. विनय कोरे,वारणा विद्यापीठाचे कुलाधिकारी, एन. एच. पाटील आणि श्री वारणा विभाग शिक्षण मंडळाचे मुख्य कार्यकारी अधिकारी डॉ. विलास कारजिन्नी यांचे मार्गदर्शन लाभले.