🟠 कोल्हापूरच्या पवित्र भूमीवर श्री अंबाबाई)मंदिर परिसर विकास आणि संवर्धन कामांचा शुभारंभ प्रसंगी आयोजित भव्य कृतज्ञता सोहळा

कोल्हापूर :  कोल्हापूरच्या पवित्र भूमीवर श्री महालक्ष्मी (अंबाबाई) मंदिर परिसर विकास आणि संवर्धन कामांचा शुभारंभ करताना केंद्रीय गृहमंत्री अमित शाह यांनी विरोधकांचा चांगलाच समाचार घेतला. अंबाबाई मंदिर कॉरिडॉरच्या महत्त्वाकांक्षी प्रकल्पाचा उल्लेख करत विकास आणि हिंदुत्वाचा वारसा जतन यावर शाह यांनी आक्रमकपणे भाष्य केले. कोल्हापुरातील पोलीस ग्राऊंडवर आयोजित  भव्य कृतज्ञता सोहळा आणि जाहीर सभेत बोलताना त्यांनी कॉंग्रेस आणि उद्धव ठाकरे यांच्यावर जोरदार टीका केली. हे लोक घुसखोरांना आपली व्होट बँक बनवून राजकारण करत आहेत, असा खळबळजनक आरोप करत शाह यांनी स्पष्ट केले की, हा देश काही धर्मशाला नाही, येथे केवळ देशात जन्मलेल्या नागरिकांनाच स्थान मिळेल. घुसखोरीच्या मुद्द्यावर बोलताना त्यांनी सीमांवरील घुसखोरी थांबवण्यासोबतच देशातील प्रत्येक घुसखोराला शोधून बाहेर काढण्याचा पुनरुच्चार केला.

भाषणादरम्यान अमित शाह यांनी पंतप्रधान नरेंद्र मोदी यांच्या नेतृत्वाखालील १२ वर्षांच्या कामाचा आढावा घेत विकास आणि वारसा जतन हेच सरकारचे मुख्य सूत्र असल्याचे अधोरेखित केले. राम मंदिर, काशी विश्वनाथ कॉरिडॉर आणि सोमनाथ मंदिराच्या पुनर्विकासाच्या मालिकेत आता अंबाबाई मंदिराचा कॉरिडॉरही विकसित केला जाणार असल्याचे सांगत त्यांनी मंदिर परिसराच्या कायापालटाचा संकल्प व्यक्त केला. यावेळी त्यांनी बंगालच्या निवडणुकांचा उल्लेख करत विरोधकांना टोला लगावला की, बंगालच्या जनतेने भाजपाला आशीर्वाद दिले आहेत. तसेच, तंत्रज्ञान क्षेत्रातील भारताची प्रगती आणि चंद्रयान-३ च्या यशामुळे निर्माण झालेला 'शिवशक्ती पॉईंट' यावर अभिमान व्यक्त करत भारताला जागतिक केंद्र बनवण्याचा आपला निर्धार त्यांनी पुन्हा व्यक्त केला.

 राज्याच्या विकासकामांसाठी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या नेतृत्वाचे कौतुक करत, १५०० कोटी रुपयांच्या निधीतून हे काम पुढील सहा महिन्यांत पूर्ण करून कोल्हापूरला भव्य यात्रा धामाच्या रूपात पाहण्याचे आश्वासन त्यांनी दिले.

🟠 ' अंबाबाई मंदिर परिसर विकासाचे स्वप्न सत्यात' : मुख्यमंत्री देवेंद्र फडणवीस
मुख्यमंत्री देवेंद्र फडणवीस यांनी कोल्हापूरच्या अंबाबाई मंदिराच्या महत्त्वावर भर दिला. हे केवळ कोल्हापूरकरांचेच नाही, तर संपूर्ण महाराष्ट्राचे आराध्य दैवत असल्याचे त्यांनी स्पष्ट केले. मंदिराच्या जीर्णोद्धारासह आणि परिसराच्या विकासासह ही इच्छा खऱ्या अर्थाने पूर्ण करण्याची सुरुवात आज झाली आहे. केंद्रीय गृहमंत्री अमित शाह यांच्या मार्गदर्शनाखाली कोल्हापूरच्या अंबाबाई मंदिराच्या परिसराचा विकास करण्याचे काम आता महाराष्ट्र सरकार हाती घेत आहे, असे फडणवीस यांनी सांगितले. तसेच, आदरणीय वहिनींच्या हस्ते मंदिराच्या भूमीपूजनाचा कार्यक्रम झाल्याचा आनंदही त्यांनी व्यक्त केला. शेवटी, भविष्यातील शंभर वर्षांचा विचार करून हे काम अत्यंत व्यापक आणि सर्वांगीण पद्धतीने पूर्ण करण्याचा सरकारचा मानस असल्याचे त्यांनी स्पष्ट केले.

🟠' कोल्हापूरच्या विकासासाठी महायुती सरकार कटिबद्ध' : उपमुख्यमंत्री एकनाथ शिंदे

 उपमुख्यमंत्री एकनाथ शिंदे यांनी आपल्या भाषणात उपस्थितांचे स्वागत करताना महाराष्ट्राच्या सर्वांगीण विकासासाठी आपले सरकार वचनबद्ध असल्याचे अधोरेखित केले. व्यासपीठावर उपस्थित असलेल्या केंद्रीय गृहमंत्री अमित शाह, मुख्यमंत्री देवेंद्र फडणवीस आणि अन्य मान्यवरांच्या उपस्थितीत बोलताना त्यांनी कोल्हापूरच्या अंबाबाई मंदिर परिसर विकासाच्या महत्त्वावर भर दिला. एकनाथ शिंदे यांनी नमूद केले की, केंद्राच्या सहकार्याने आणि राज्याच्या पुढाकाराने कोल्हापूरच्या ऐतिहासिक आणि सांस्कृतिक वारशाचे जतन करत शहर अधिक आधुनिक व प्रगत करण्याकडे सरकारचे प्राधान्य आहे. या विकासकामांच्या अंमलबजावणीमुळे स्थानिक पातळीवर रोजगाराच्या संधी आणि पर्यटनाला मोठी चालना मिळेल, असा विश्वास त्यांनी व्यक्त केला. शेवटी, कोल्हापूरच्या विकासासाठी आणि जनतेच्या सोयीसाठी आखलेल्या सर्व योजना वेळेत पूर्ण करण्याचा आपला संकल्प असल्याचे स्पष्ट केले.

🟠 'विकास आणि वारसा जतन: कोल्हापूरच्या विकासासाठी सामूहिक प्रयत्न' : पालकमंत्री प्रकाश आबिटकर
 पालकमंत्री प्रकाश आबिटकर यांनी आपल्या भाषणात उपस्थितांचे स्वागत करताना महाराष्ट्राच्या प्रगतीसाठी एकत्रित प्रयत्नांचे महत्त्व अधोरेखित केले. कार्यक्रमात उपस्थित असलेल्या केंद्रीय गृहमंत्री अमित शाह, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांसारख्या वरिष्ठ नेतृत्वाचे त्यांनी स्वागत केले. कोल्हापूरच्या सर्वांगीण विकासासाठी आणि वारसा जतनासाठी हे काम अत्यंत मोलाचे ठरणार असल्याचे त्यांनी नमूद केले. या विकासकार्यात स्थानिक लोकप्रतिनिधी आणि प्रशासनाच्या योगदानाचे कौतुक करत, हा उपक्रम कोल्हापूरच्या समृद्ध वारशाला एक नवी ओळख देईल आणि भविष्यात शहर अधिक प्रगत व आधुनिक होईल, असा विश्वास त्यांनी व्यक्त केला. तसेच, विकासकामांच्या अंमलबजावणीसाठी आणि जनसामान्यांच्या सोयीसाठी सुरू असलेल्या सर्व योजनांचा सकारात्मक परिणाम कोल्हापूरच्या जनतेला जाणवेल, 

🟠 'विकसित भारताचे स्वप्न आज सत्यात उतरत आहे' : खा. धनंजय महाडिक यांचा विश्वास

कोल्हापूरच्या पवित्र भूमीवर केंद्रीय गृहमंत्री अमित शाह यांचे स्वागत करताना खासदार धनंजय महाडिक यांनी आपल्या भाषणात पंतप्रधान नरेंद्र मोदीजींच्या नेतृत्वाखालील प्रगतीवर भाष्य केले. त्यांनी स्पष्ट केले की, आज भारत केवळ वेगाने पुढे जात नाहीये, तर जागतिक स्तरावर नेतृत्व करण्यास सज्ज झाला असून, 'विकसित भारता चे स्वप्न हे आता केवळ एक स्वप्न राहिलेले नसून तो प्रत्येक भारतीयाचा विश्वास बनला आहे. गरीब कुटुंबांपर्यंत पोहोचणाऱ्या सरकारी योजना, महिलांचे सक्षमीकरण आणि तरुणांना रोजगाराच्या संधी उपलब्ध करून देणारी 'पंतप्रधान विकसित भारत रोजगार योजना' ही मोदी सरकारची मोठी उपलब्धी असल्याचे त्यांनी नमूद केले. कोल्हापूरच्या विकासाबाबत बोलताना त्यांनी अंबाबाई मंदिर परिसर विकासासाठी राज्य सरकारने मंजूर केलेल्या १४४५ कोटी रुपयांच्या निधीचा उल्लेख केला आणि मंदिर परिसराच्या कायापालटासह रेल्वे स्टेशन, हायकोर्टाचे सर्किट बेंच आणि १२५० बेडचे सरकारी रुग्णालय यांसारख्या कामांवर वेगाने काम सुरू असल्याचे सांगितले. महायुतीमुळे कोल्हापूर आणि इचलकरंजी दोन्ही ठिकाणी पहिल्यांदाच भारतीय जनता पार्टीचे महापौर निवडून आले असून, हा जनतेचा आशीर्वाद असल्याचे त्यांनी सांगितले. तसेच, कोल्हापूरच्या महालक्ष्मी मंदिराला केंद्र सरकारच्या 'प्रसाद' योजनेत समाविष्ट करून, त्याद्वारे कनेक्टिविटी, पार्किंग आणि भक्तांच्या सुविधा वाढवण्याची मागणी त्यांनी केली आहे. शेवटी, अमित शाह यांचा हा दौरा सर्व कार्यकर्त्यांमध्ये नवीन ऊर्जा, उत्साह आणि राष्ट्रसेवेचा नवीन संकल्प जागवणारा असल्याचे सांगत खा. महाडिक यांनी आपल्या भाषणाचा समारोप केला.

 वैद्यकीय शिक्षण मंत्री हसन मुश्रीफ यांनी आभार मानले. यावेळी उच्च व तंत्रशिक्षण आणि संसदीय कार्य मंत्री चंद्रकांत (दादा) पाटील,  सार्वजनिक बांधकाम मंत्री शिवेंद्रराजे भोसले , नगरविकास, परिवहन, सामाजिक न्याय राज्यमंत्री तथा सह पालकमंत्री माधुरी मिसाळ, राज्य नियोजन मंडळाचे कार्यकारी अध्यक्ष राजेश क्षीरसागर, आमदार विनय कोरे आमदार अमल महाडिक महापौर रूपाराणी निकम,  भाजपा कोल्हापूर जिल्हाध्यक्ष विजय जाधव, ग्रामीण जिल्हाध्यक्ष नाथाजी पाटील, यांच्यासह स्थानिक खासदार, आमदार आणि पदाधिकारी, कार्यकर्ते उपस्थित होते.