ढाका : बांगलादेशची राजधानी ढाका येथे पंतप्रधान शेख हसीना यांच्या राजीनाम्याची मागणी करत निदर्शने करणारे लोक आणि सत्ताधारी अवामी लीगच्या समर्थकांमध्ये रविवारी झालेल्या संघर्षात किमान 32 जण ठार तर 30 जण जखमी झाले.
सरकारच्या राजीनाम्याच्या मागणीसाठी आंदोलक 'असहकार कार्यक्रम'मध्ये सहभागी होण्यासाठी आले होते. अवामी लीग, छात्र लीग आणि जुबो लीगच्या कार्यकर्त्यांनी त्यांना विरोध केला आणि त्यानंतर दोन्ही पक्षांमध्ये हाणामारी झाली. निदर्शकांनी पंतप्रधान शेख हसीना यांच्या राजीनाम्याची मागणी केली आणि आरक्षण सुधारणांबाबत नुकत्याच झालेल्या निदर्शनांमध्ये मृत्युमुखी पडलेल्यांना न्याय मिळावा या मागणीसाठी घोषणाबाजी केली. असहकार आंदोलनाच्या पहिल्या दिवशी राजधानीतील सायन्स लॅब चौकातही आंदोलक जमा झाले आणि त्यांनी सरकारविरोधी घोषणा दिल्या.
बांगलादेशच्या अनेक भागांमध्ये हिंसाचाराच्या ताज्या उद्रेकादरम्यान, पंतप्रधान शेख हसीना यांनी रविवारी सांगितले की, निषेधाच्या नावाखाली तोडफोड करणारे विद्यार्थी नसून दहशतवादी आहेत आणि अशा घटकांवर कठोरपणे कारवाई करणे आवश्यक आहे. पंतप्रधान म्हणाले की, मी देशवासियांना आवाहन करतो की, या दहशतवाद्यांना कठोरपणे दडपावे. या बैठकीला लष्कर, नौदल, हवाई दल, पोलीस, रॅपिड ॲक्शन बटालियन (RAB), बॉर्डर गार्ड बांगलादेश (BGB) आणि इतर उच्च सुरक्षा अधिकारी उपस्थित होते. या बैठकीत पंतप्रधानांचे सुरक्षा सल्लागार आणि गृहमंत्रीही उपस्थित होते.