कोल्हापूर : मराठा आरक्षणाच्या मागणीसाठी सकल मराठा समाजाच्या वतीने ऐतिहासिक दसरा चौकात अनोख्या पद्धतीने आंदोलन करण्यात आले. पारंपरिक वेशभूषेत सहभागी होत आंदोलकांनी गोंधळ घालत सरकारने मराठा समाजाच्या प्रलंबित मागण्यांवर तातडीने निर्णय घ्यावा, अशी मागणी करण्यात आली.

दसरा चौकातील राजर्षी छत्रपती शाहू महाराज यांच्या पुतळ्यासमोर हे आंदोलन करण्यात आले. ढोल-ताशांच्या गजरात आणि पारंपरिक गोंधळाच्या माध्यमातून मराठा आरक्षणाच्या मागणीसाठी शासनाचे लक्ष वेधण्यात आले.

मराठा आरक्षणासाठी संघर्षयोद्धा मनोज जरांगे-पाटील यांनी अंतरवाली सराटी येथे सुरू केलेल्या उपोषणाच्या पार्श्वभूमीवर कोल्हापुरातही आंदोलनाला ठाम पाठिंबा देण्यात आला. सरकारने मराठा समाजाच्या मागण्यांकडे गांभीर्याने पाहून तातडीने निर्णय घ्यावा, अन्यथा आंदोलन अधिक तीव्र करण्याचा इशारा यावेळी देण्यात आला.

यावेळी वसंतराव मुळीक, रुपेश पाटील, दिलीप देसाई, चंद्रकांत पाटील, प्रतिक साळुंखे, दिलीप सावंत, राहुल इंगवले, राहुल पाटील, संतोष बरगे, प्रवीण पाटील, अशोक गायकवाड, शैलजा भोसले, सुनीता पाटील, दीपा डोणे, उषा तोरस्कर, पद्मजा पोवार, अनुराधा पाटील, वनिता निंबाळकर, सर्वदा हरणे, सरपंच कुमार कोराणे, सूर्यमान इंगळे, कृष्णात माने, सात्विक मोहिते, चैतन्य जाधव, महादेव जाधव, सुनील चव्हाण, शिवराज गावडे आदी उपस्थित होते.