बारामती : बारामती आणि राहुरी विधानसभा पोटनिवडणुकीच्या प्रचाराचा आज शेवटचा दिवस होता. बारामतीमध्ये राष्ट्रवादी काँग्रेसच्या उमेदवार आणि उपमुख्यमंत्री सुनेत्रा पवार यांच्या प्रचारार्थ आयोजित करण्यात आलेल्या सांगता सभेला मुख्यमंत्री देवेंद्र फडणवीस यांच्यासह महायुतीतील दिग्गज नेत्यांनी उपस्थिती लावली. 

या सभेत बोलताना मुख्यमंत्र्यांनी अजित पवार यांच्या कार्याचा गौरव केला आणि सुनेत्रा पवार यांच्या नेतृत्वात बारामतीचा विकास पुढे नेण्याची ग्वाही दिली.
राज्याला सलग ११ अर्थसंकल्प सादर करून विकासाचा पाया रचण्यात अजित दादांचे योगदान अत्यंत महत्त्वाचे असल्याचे मुख्यमंत्र्यांनी नमूद केले. अजित दादांच्या दुर्दैवी अपघाताबाबत जनमानसात असलेल्या शंकांचे निरसन करण्यासाठी, या प्रकरणातील सत्य बाहेर येईपर्यंत शासन स्वस्थ बसणार नाही, असे आश्वासनही त्यांनी यावेळी दिले.

नीरा नदीजोड प्रकल्प, जनाई शिरसाई बंदिस्त पाईपलाईन, शिवसृष्टी, बाह्य वळण रस्ता आणि कर्करोग रुग्णालय यांसारखी अजित दादांनी सुरू केलेली शेकडो कामे सुनेत्रा पवार यांच्या नेतृत्वात पूर्ण केली जातील, असे मुख्यमंत्री म्हणाले. तसेच, या पोटनिवडणुकीत राजकीय परंपरेला साजेसा निर्णय घेत काँग्रेससह इतर पक्षांनी उमेदवार न दिल्याने मुख्यमंत्र्यांनी सर्वांचे आभार मानले.
या प्रसंगी सुनेत्रा पवार यांनी अजित दादा पवार यांच्या स्मृती चिरकाल टिकवण्यासाठी आणि त्यांच्या कार्याची माहिती पुढच्या पिढीला देण्यासाठी 'अजित दादा पवार म्युझियम' उभारण्याची घोषणा केली.

 सभेपूर्वी मुख्यमंत्र्यांनी बारामतीतील अजित पवार यांच्या स्मृतीस्थळावर जाऊन आदरांजली वाहिली. या दोन्ही विधानसभा मतदारसंघांत येत्या २३ एप्रिल रोजी मतदान होणार आहे.