◼️स्थानिक गुन्हे अन्वेषण शाखेची धडक कारवाई; २ लाख ९० हजार रुपयांचा मुद्देमाल हस्तगत व दोन गुन्हे उघडकीस

कोल्हापूर : गोकुळ शिरगांव एमआयडीसी परिसरातील कंपनीमधून कार्बाइड इन्सर्ट आणि घरफोडीचा इतर माल चोरणाऱ्या दोन अट्टल गुन्हेगारांना स्थानिक गुन्हे अन्वेषण शाखेच्या पथकाने जेरबंद केले आहे. या कारवाईत पोलिसांनी २ लाख ९० हजार रुपये किमतीचा मुद्देमाल हस्तगत करून एकूण दोन गुन्हे उघडकीस आणले आहेत.

एमआयडीसी परिसरातील कंपन्यांमध्ये चोरीच्या गुन्ह्यांमध्ये वाढ झाल्याने पोलीस अधीक्षक निलोत्पल यांनी हे गुन्हे लवकरात लवकर उघडकीस आणण्याबाबत स्थानिक गुन्हे अन्वेषण शाखेचे पोलीस निरीक्षक सुशांत चव्हाण यांना मार्गदर्शन व सूचना दिल्या होत्या. त्यानुसार पोलीस निरीक्षक सुशांत चव्हाण यांनी पोलीस उपनिरीक्षक जालिंदर जाधव यांचे विशेष पथक तयार केले होते.

तपास पथकाने घटनास्थळावरील सीसीटीव्ही फुटेज तपासून आणि गोपनीय बातमीदारांमार्फत माहिती मिळवली असता, गोकुळ शिरगांव पोलीस ठाण्यातील गुन्ह्यातील रेकॉर्डवरील गुन्हेगार आदिनाथ नरसिंगे आणि त्याचा साथीदार चोरीचा माल विकण्यासाठी शिरोली एमआयडीसीमधील हिंदुस्थान इंडस्ट्रीजसमोर येणार असल्याची खात्रीशीर माहिती मिळाली.

आरोपींची नावे:
 * आदिनाथ संजय नरसिंगे (वय २७, रा. माळवाडी इंगळेकर कॉलनी, शिरोली पुलाची, ता. हातकणंगले)
 * शाहरुख खुदबुद्दीन जिरगाळे (वय २४, रा. रहेमतनगर, शिरोली पुलाची, ता. हातकणंगले, मूळ गाव- आयगळी, ता. अथनी, जि. बेळगांव)
हस्तगत केलेले साहित्य व उघडकीस आलेले गुन्हे:
पोलिसांनी सापळा रचून दोन्ही आरोपींना ताब्यात घेतले आणि त्यांच्याकडून एमटीएफएनएल, डीसीएलएनएल, पीसीएलएनआर, डायमीटर, डीएनएमजी, टीएनएमजी, सीएनएमजी कंपनीचे टूल, स्पेअर पार्ट आणि वेगवेगळ्या आकाराचे इन्सर्ट असा एकूण २,९०,०००/- रुपये किमतीचा माल जप्त केला. आरोपींनी गुन्हा केल्याची कबुली दिली असून, त्यांच्याकडून गोकुळ शिरगांव पोलीस ठाण्याकडील गु.र.नं. ८२/२०२६ आणि गु.र.नं. ९७/२०२६ असे दोन गुन्हे उघडकीस आले आहेत. मुख्य आरोपी आदिनाथ नरसिंगे याच्यावर यापूर्वीही विविध पोलीस ठाण्यांमध्ये ३ गुन्हे दाखल आहेत.
पोलिसांच्या या उल्लेखनीय कामगिरीबद्दल वरिष्ठ अधिकाऱ्यांनी पथकाचे कौतुक केले आहे.