▪️जिल्हाधिकारी व मुख्य कार्यकारी अधिकारी यांच्यासह अधिकारी कर्मचाऱ्यांचा ईव्ही, सायकलद्वारे सहभाग

कोल्हापूर : पर्यावरणपूरक जीवनशैलीचा प्रसार आणि प्रदूषण कमी करण्याच्या उद्देशाने आज १० ऑक्टोबर रोजी संपूर्ण जिल्ह्यात ‘ग्रीन डे’ उपक्रम उत्साहात साजरा करण्यात आला. या उपक्रमात जिल्ह्यातील सर्व शासकीय, निमशासकीय संस्था, शैक्षणिक संस्था तसेच नागरिकांनी मोठ्या उत्साहाने सहभाग नोंदवला.

जिल्हाधिकारी अमोल येडगे आणि जिल्हा परिषदेचे मुख्य कार्यकारी अधिकारी कार्तिकेयन एस. यांनी स्वतः सायकलचा वापर करुन कार्यालयात येत उपक्रमात प्रत्यक्ष सहभाग घेत पर्यावरण संरक्षणाचा संदेश दिला. 

या अभिनव उपक्रमाद्वारे कोल्हापूर जिल्ह्याने देशभरात पर्यावरणपूरक जीवनशैलीचा आदर्श निर्माण केला असून, हा उपक्रम केवळ एका दिवसापुरता न राहता वर्षभर आपल्या दैनंदिन जीवनात अंमलात आणावा, असे आवाहन जिल्हाधिकारी अमोल येडगे यांनी  केले. 

सर्व अधिकारी कर्मचारी आज 'ग्रीन डे’ उपक्रमात सहभागी झाले तसेच इतर सर्व कर्मचारी, नागरिकांनी आज दिवसभर वीज, इंधन, कागद, प्लास्टिक आणि मोबाइल यांचा कमीत कमी वापर करुन या उपक्रमात सहभागी  झाले. हा उपक्रम दर दिवशी साजरा करण्यात यावा असे आवाहन जिल्हा परिषदेचे मुख्य कार्यकारी अधिकारी कार्तिकेयन एस. यांनी केले.

यामध्ये शासकीय, निमशासकीय, खासगी कार्यालयातील अधिकारी कर्मचारीही सहभागी झाले होते. ‘ग्रीन डे’ अंतर्गत कर्मचाऱ्यांनी वीज व इंधनाचा वापर कमी करुन, कार्यालयीन कामकाजात कागदाऐवजी डिजिटल प्रणालीचा वापर, लिफ्टऐवजी जिन्याचा वापर तसेच प्लास्टिकमुक्त उपक्रमांचा अवलंब केला. अनेकांनी सार्वजनिक वाहतुकीला प्राधान्य देत सायकल व पायी प्रवासाचा स्वीकार केला. 

सकाळच्या सत्रात शाळा व महाविद्यालयांमधून विद्यार्थ्यांनी पर्यावरण संवर्धनासाठी जनजागृती उपक्रम राबवण्यात आले. 'ग्रीन डे' निमित्त पर्यावरणपूरक जीवनशैली अंगीकारण्याची प्रतिज्ञा आज सर्व शाळा, कार्यालयांमध्ये घेण्यात आली.