कोल्हापूर : दरवर्षीप्रमाणे यावर्षीही पर्यावरणावर आधारित ‘किर्लोस्कर वसुंधरा आंतरराष्ट्रीय चित्रपट महोत्सवा’चे आयोजन सायबर महाविद्यालयाच्या राधाबाई शिंदे सभागृहात करण्यात आले आहे. हा महोत्सव मंगळवार, दि. २७ ऑक्टोबर व बुधवार, दि. २८ ऑक्टोबर रोजी सकाळी १० ते सायंकाळी ५ या वेळेत संपन्न होणार आहे.

​महोत्सवाचे उद्घाटन कोल्हापुरातील उद्योजिका श्रीमती मोनिका मोहिते, ‘किर्लोस्कर ऑइल इंजिन्स’ कंपनीचे साईट लीडर श्री. सुरेश मगदूम, किर्लोस्करचे एचआर प्रमुख हरीश सायवे आणि सायबरचे संचालक डॉ. आर. के. टेलर यांच्या प्रमुख उपस्थितीत होणार आहे.

​या दोन दिवसीय महोत्सवात पर्यावरणावर आधारित विविध लघुपटांचे सादरीकरण करण्यात येणार असून, विद्यार्थ्यांसाठी पर्यावरणपूरक विविध स्पर्धांचे आयोजनही करण्यात आले आहे. तसेच डी. वाय. पाटील मेडिकल कॉलेजच्या अधिष्ठाता डॉ. शिंपा शर्मा यांचे मार्गदर्शन लाभणार असून, तेजस झगडे, चिदंबर शिंदे व सागर चौगुले यांचे पर्यावरणीय प्रात्यक्षिक सादरीकरण होणार आहे.

​माण तालुक्यातील रोहित बनसोडे, रक्षिता बनसोडे आणि योगेश फोंडे यांचा त्यांच्या पर्यावरण क्षेत्रातील उल्लेखनीय योगदानाबद्दल डी. वाय. पाटील विद्यापीठाचे कुलगुरू डॉ. राकेश शर्मा यांच्या हस्ते विशेष सत्कार केला जाणार आहे.

​महोत्सवाच्या आयोजनाबाबतची सविस्तर माहिती किर्लोस्कर सामाजिक बांधिलकी उपक्रम अधिकारी शरद आजगेकर, लक्ष्मी फाउंडेशनचे अध्यक्ष विनायक देसाई, तसेच सायबर संस्थेचे प्रा. डॉ. दीपक भोसले आणि प्रा. डॉ. पूजा पाटील यांनी पत्रकार परिषदेत दिली.