◼️प्रत्येक विभागीय कार्यालयास १० लाखांची तरतूद; पावसाचे पाणी साचणाऱ्या ठिकाणीही उपाययोजना
◼️आज अखेर 104 ठिकाणी आवश्यकतेप्रमाणे नवीन चेंबर बसविणे व जुने चेंबर वर उचलण्यात आले

कोल्हापूर : शहरातील मुख्य रस्त्यांवर अनेक ठिकाणी खराब झालेले तसेच पावसाचे पाणी साचून राहणारे चेंबर दुरुस्त करण्यासाठी महापालिका आयुक्त डॉ. राजेंद्र भारूड यांनी तातडीने उपाययोजना करण्याच्या सूचना दिल्या होत्या. त्यानुसार शहरातील चारही विभागीय कार्यालयांना प्रत्येकी १० लाख रुपये, अशी एकूण ४० लाख रुपयांची तरतूद करण्यात आली असून, या निधीतून खराब चेंबर बदलणे, रस्त्याखाली गेलेले चेंबर वर उचलणे, पावसाच्या पाण्याचा निचरा सुरळीत करणे तसेच खराब झालेल्या पाइप व क्रॉसिंगची दुरुस्ती करण्याची कामे सुरू करण्यात आली आहेत.

विभागीय कार्यालयांच्या कार्यक्षेत्रात करण्यात आलेल्या कामांमध्ये संध्यामठ परिसर, सिद्धार्थनगर, गोखले कॉलेज चौक, उत्तरेश्वर पेठ परिसरातील एकूण २७ खराब झालेले चेंबर बदलणे व जुनी चेंबर उचलून बसविण्यात आले आहेत. तसेच रुईकर कॉलनी, निशा हॉटेल परिसर, शाहूपुरी पोलिस स्टेशनसमोरील परिसर, मुक्त सैनिक परिसर व शाहूपुरी पोलिस स्टेशन परिसरात सुमारे ३० चेंबरची दुरुस्ती व बदलाची कामे करण्यात आली आहेत.
याचबरोबर विनोद कॉर्नर, शाहू मिल परिसर, सम्राटनगर परिसर आदी ठिकाणी सुमारे १७ चेंबरची कामे करण्यात आली असून जेव्हा नाना पार्क परिसरात 30 चेंबर ची कामे करण्यात आली आहेत. त्याचबरोबर आवश्यक त्या ठिकाणी क्रॉसिंग तसेच खराब झालेल्या पाइपचीही दुरुस्ती व बदल करण्यात आला आहे.

पावसाळ्याच्या पार्श्वभूमीवर पाणी साचणाऱ्या ठिकाणांची पाहणी करून तेथील चेंबरची दुरुस्ती व पाण्याचा निचरा सुरळीत करण्यावर विशेष भर देण्यात आला आहे. ही कामे तातडीने पूर्ण केल्यामुळे शहरातील अनेक ठिकाणी पावसाचे पाणी साचण्याची समस्या कमी झाली असून, खराब चेंबर बदलल्यामुळे रस्त्यावरील वाहतुकीसही अडथळा निर्माण होत नसल्याने वाहतूक सुरळीत राहण्यास मदत होत आहे.
शहरातील रस्त्यांवरील खराब चेंबर, पाण्याचा निचरा आणि संबंधित पायाभूत सुविधांची आवश्यकतेनुसार तातडीने दुरुस्ती करण्याची कार्यवाही पुढेही महापालिकेच्या वतीने सुरू ठेवण्यात येणार आहे.