कोल्हापूर  : प्राथमिक शिक्षण समिती, कोल्हापूर अंतर्गत मनपा राजर्षी शाहू विद्यामंदिर शाळा क्र. ११, कसबा बावडा, कोल्हापूर येथे आज दिनांक २ ऑक्टोबर रोजी राष्ट्रपिता महात्मा गांधी यांची जयंती आणि स्वच्छता दिन अत्यंत उत्साहात साजरा करण्यात आला.
कार्यक्रमाची सुरुवात शालेय परिसर व क्रीडांगण स्वच्छ करून आणि क्रीडांगणावरील रोपांना पाणी घालून करण्यात आली. बोलण्यापेक्षा कृतीवर भर देणारे उपक्रम भारत स्काऊट गाईडच्या माध्यमातून शालेय विद्यार्थ्यांकडून सातत्याने केले जातात.

कार्यक्रमाच्या अध्यक्षस्थानी केंद्र शाळा मुख्याध्यापक  डॉ. अजितकुमार पाटील हे होते. त्यांनी विद्यार्थ्यांना मार्गदर्शन करताना सांगितले की, "सत्य, शिक्षण आणि संस्काराचा संगम म्हणजे महात्मा गांधीजी." तसेच "नेहमी खरे बोला, आई-वडिलांचे ऐका, सत्य हाच धर्म, अहिंसा परमो धर्म आणि स्वच्छता राखा" या पंचसूत्रीचा संदेश त्यांनी विद्यार्थ्यांना समजावून सांगितला.
शालेय संदर्भात धर्माचा खरा अर्थ स्पष्ट करताना ते म्हणाले की, शाळेत धर्म म्हणजे नियम, स्वच्छता आणि प्रामाणिकपणा होय. एखादे मूल अभ्यास करत नसेल, तर त्याला समजावून सांगणे व त्याला वेळ देणे हीच खरी अहिंसा आहे. आपण सर्वांनी महात्मा गांधीजींच्या स्वप्नातील 'स्वच्छ भारत, स्वच्छ विद्यालय, साक्षर भारत आणि अहिंसक भारत' हे ध्येय कोल्हापूरच्या या छोट्या शाळेतून पूर्ण करूया. याशिवाय त्यांनी गांधीजींच्या भारत भ्रमणाविषयी अतिशय उपयुक्त माहिती दिली.

"स्वच्छ भारत, स्वच्छ कोल्हापूर, प्रदूषण मुक्त परिसर" या संकल्पनेवर आधारित इयत्ता ४ थी व ७ वीच्या विद्यार्थ्यांनी स्वच्छतेचे महत्त्व पटवून देणारे आणि प्लास्टिक वापरामुळे होणारे दुष्परिणाम दर्शवणारे प्रभावी पथनाट्य सादर केले.
कार्यक्रमात पालक  अजित पवार यांनी गांधीजींच्या जीवनावरील सुंदर आणि प्रेरणादायी माहिती विद्यार्थ्यांना दिली. महिला पालक सौ. शितल पाटील यांनी स्वच्छतेचे महत्त्व सांगत 'आपली शाळा, आपला वर्ग आपणच स्वच्छ ठेवूया' असे आवाहन केले. गांधी जयंतीनिमित्त विविध विद्यार्थ्यांनी स्फूर्तीदायी भाषणे देखील सादर केली.
याप्रसंगी शाळेच्या माजी विद्यार्थिनी  आरोही मोगरे,  हर्षदा दाभाडे आणि  किमया चौगले आवर्जून उपस्थित होत्या. कार्यक्रमाचे सूत्रसंचालन कीर्तीकर यांनी केले, तर आभार प्रदर्शन  अमित पोटकुले सर यांनी मानले.
या महत्त्वपूर्ण कार्यक्रमास शाळा व्यवस्थापन समितीचे सदस्य, माजी विद्यार्थी  तुकाराम लाखे, मयूर रसाळ यांच्यासह सर्व शिक्षक, विद्यार्थी व पालक मोठ्या संख्येने उपस्थित होते.