कोल्हापूर  : कोल्हापूर जिल्ह्यातील महामार्गावरील एका हॉटेलमध्ये सुरू असलेल्या क्रिकेट बेटिंग अड्ड्यावर स्थानिक गुन्हे अन्वेषण शाखेने छापा टाकून मोठी कारवाई केली आहे. जिल्हा पोलीस अधीक्षक नीलोत्पल आणि पोलीस निरीक्षक सुशांत चव्हाण यांच्या सूचनेनुसार ही कारवाई करण्यात आली. ४ मे २०२६ रोजी रात्री मुंबई इंडियन्स आणि लखनऊ सुपर जायंट्स या संघांमधील आयपीएल सामन्यावर मोबाईल ॲपद्वारे जुगार सुरू असल्याची गोपनीय माहिती पोलिसांना मिळाली होती. या माहितीच्या आधारे पथकाने हॉटेलमधील रूम नंबर १०२ वर छापा टाकला.

या कारवाईत पोलिसांनी फारुख नजीर मुल्लाणी, जितेंद्र आप्पासाहेब घोडके, अजित बाळासो कोरवी आणि जॉन्सन जेरुन फर्नांडीस या चार इसमांना ताब्यात घेतले आहे. यामध्ये अजित कोरवी हा बेटिंगचा मालक असल्याचे निष्पन्न झाले असून, आरोपींकडून रोख रक्कम आणि मोबाईल हँडसेटसह एकूण ३,०५,८६० रुपयांचा मुद्देमाल जप्त करण्यात आला आहे. 

ताब्यात घेतलेल्या सर्व आरोपींविरुद्ध कागल पोलीस ठाण्यात महाराष्ट्र जुगार कायद्यांतर्गत गुन्हा दाखल करण्यात आला असून पुढील तपास पोलीस करत आहेत.