कोल्हापूर :  येथील मुक्त सैनिक वसाहत परिसरात झालेली घरफोडी उघडकीस आणण्यात स्थानिक गुन्हे अन्वेषण शाखेला यश आले आहे. ८ एप्रिल २०२६ रोजी संतोष बिरु यमकर यांच्या बंद घराचा दरवाजा उघडून अज्ञात चोरट्याने २० ग्रॅम सोन्याचे गंठण आणि रोख रक्कम लंपास केली होती. 

याप्रकरणी शाहुपुरी पोलीस ठाण्यात गुन्हा दाखल झाल्यानंतर पोलीस अधीक्षक नीलोत्पल यांनी समांतर तपासाचे आदेश दिले होते. सीसीटीव्ही फुटेज आणि तांत्रिक माहितीच्या आधारे तपास करत असताना, अक्षय महादेव बोकमूरकर (वय ३७, रा. काटे मळा) याने हा गुन्हा केल्याची गोपनीय माहिती पोलिसांना मिळाली.
मिळालेल्या माहितीनुसार, स्थानिक गुन्हे अन्वेषण शाखेच्या पथकाने मुक्त सैनिक वसाहत येथील रिक्षा स्टॉपजवळ सापळा लावून अक्षय बोकमूरकर याला ताब्यात घेतले. 

सुरुवातीला उडवाउडवीची उत्तरे देणाऱ्या अक्षयने कौशल्यपूर्ण तपासानंतर गुन्ह्याची कबुली दिली. त्याच्या ताब्यातून ३,४५,००० रुपये किमतीचे २३.२०० ग्रॅम वजनाचे सोन्याचे गंठण जप्त करण्यात आले आहे. पोलीस निरीक्षक सुशांत चव्हाण आणि उपनिरीक्षक संतोष गळवे यांच्या नेतृत्वाखालील पथकाने ही कारवाई पूर्ण करून आरोपीला पुढील तपासासाठी शाहुपुरी पोलिसांच्या हवाली केले आहे.