कोल्हापूर  : ​कोल्हापूरच्या स्थानिक गुन्हे अन्वेषण शाखेने (LCB) एका धाडसी कारवाईत शिरोली एमआयडीसी परिसरात घरगुती वापराच्या गॅस टाक्यांची बेकायदेशीर वाहतूक आणि विक्री करणाऱ्या रॅकेटचा पर्दाफाश केला आहे. या कारवाईत दोन इसमांना ताब्यात घेण्यात आले असून, मुख्य मालकासह एकूण तीन जणांवर शिरोली एमआयडीसी पोलीस ठाण्यात गुन्हा दाखल करण्यात आला आहे.  

​पोलीस अधीक्षक नीलोत्पल यांच्या मार्गदर्शनाखाली, स्थानिक गुन्हे अन्वेषण शाखेचे पोलीस निरीक्षक श्री. सुशांत चव्हाण यांनी अवैध गॅस विक्री करणाऱ्यांविरुद्ध कडक कारवाईचे आदेश दिले होते. या अनुषंगाने, सहाय्यक पोलीस निरीक्षक सागर वाघ यांच्या पथकाला शिरोली एमआयडीसीमधील रिक्षा व टेम्पो असोसिएशन चौकात एका मारुती सुझुकी टेम्पोमधून (क्रमांक MH-०९-GJ-३२७४) ४ किलोच्या घरगुती गॅस टाक्या विक्रीसाठी येणार असल्याची गोपनीय माहिती मिळाली होती.  

​मिळालेल्या माहितीनुसार, पोलिसांनी तातडीने छापा टाकला असता, मयुर संतोष भरणकर (वय २६, रा. उचगाव) आणि मो. वसीम सईद खान (वय ४४, रा. वळीवडे, मूळ रा. मेरठ, उत्तर प्रदेश) हे दोघे टेम्पोमधून टाक्यांची विक्री करत असल्याचे आढळले. हे दोघे मुख्य मालक मोहित सुरेशचंद गुप्ता (रा. वळीवडे) याच्या सांगण्यावरून कामगारांना गॅस पुरवत होते.  

​या कारवाईत पोलिसांनी ४ किलोच्या एकूण ३८ गॅस टाक्या आणि वाहतुकीसाठी वापरलेला टेम्पो असा एकूण ३ लाख २० हजार २०० रुपये किमतीचा मुद्देमाल जप्त केला आहे. याप्रकरणी तिन्ही आरोपींविरुद्ध गुन्हा दाखल करण्यात आला असून, पुढील तपास शिरोली एमआयडीसी पोलीस करत आहेत.