शिंगणापूर: कोल्हापूर जिल्ह्यातील शिंगणापूर (माळवाडी) येथे आज सकाळी खेळता-खेळता नदीत पडल्याने ४ वर्षीय मानस गणेश कांबळे या चिमुकल्याचा दुर्दैवी मृत्यू झाला. वडिलांसोबत नदीकाठी गेलेला मानस अचानक खोल पाण्यात गेल्याने बुडाला.
 
स्थानिक युवक आणि कोल्हापूर महानगरपालिका अग्निशामक दलाच्या सुमारे दोन तासांच्या शर्थीच्या प्रयत्नांनंतर मानसचा मृतदेह बाहेर काढण्यात आला.

 गवंडी कामगार असलेल्या कांबळे कुटुंबाचा हा एकुलता मुलगा होता. या घटनेने परिसरात मोठी हळहळ व्यक्त होत असून कुटुंबावर दुःखाचा डोंगर कोसळला आहे. या घटनेमुळे नदीकाठावरील सुरक्षिततेचा प्रश्न पुन्हा ऐरणीवर आला असून, मुलांच्या सुरक्षेबाबत पालकांनी अधिक सतर्क राहण्याचे आवाहन केले जात आहे.