कोल्हापूर: पन्हाळा तालुक्यातील कोलोली येथे एका शेतात झालेल्या ५५ वर्षीय महिलेच्या खुनाचा क्लिष्ट गुन्हा उघडकीस आणण्यात कोल्हापूर स्थानिक गुन्हे अन्वेषण शाखेला  यश आले आहे. छबुताई सर्जेराव पाटील असे मयत महिलेचे नाव असून, अतिप्रसंगाचा प्रयत्न हाणून पाडल्याच्या रागातून गावातीलच एका ५१ वर्षीय नराधमाने त्यांची धारदार शस्त्राने वार करून निर्घृण हत्या केल्याची धक्कादायक माहिती तपासात समोर आली आहे. याप्रकरणी पोलीस पथकाने आरोपी अंकुश हणमंत पाटील (रा. कोलोली) याला अटक केली आहे.

ही घटना २४ मे २०२६ रोजी रात्रीच्या सुमारास कोलोली येथील मासुलकी नावाच्या शेतात घडली होती. छबुताई शेतात काम करत असताना अज्ञात इसमाने त्यांच्यावर हल्ला करून त्यांना ठार मारले होते. याप्रकरणी पन्हाळा पोलीस ठाण्यात भारतीय न्याय संहिता २०२३ च्या कलम १०३ (१) अन्वये गुन्हा दाखल करण्यात आला होता. गुन्हा घडलेले ठिकाण गावापासून दुर्गम आणि शेतात असल्याने पोलिसांसमोर या खुनाचा छडा लावण्याचे मोठे आव्हान होते.

गुन्ह्याचे गांभीर्य ओळखून पोलीस अधीक्षक  नीलोत्पल यांच्या सूचनेनुसार स्थानिक गुन्हे शाखेचे पोलीस निरीक्षक सुशांत चव्हाण यांच्या नेतृत्वाखाली सहाय्यक पोलीस निरीक्षक सागर वाघ, पोलीस उपनिरीक्षक संतोष गळवे आणि अंमलदारांचे विशेष पथक तयार करण्यात आले.

 पथकाने घटनास्थळाची बारकाईने पाहणी केली आणि तांत्रिक पुरावे तसेच गोपनीय बातमीदारांच्या मदतीने संशयित अंकुश पाटील याला ताब्यात घेतले.
पोलीस अधीक्षक कार्यालयात आणून त्याची कौशल्यपूर्ण चौकशी केली असता, त्याने गुन्ह्याची कबुली दिली. छबुताई यांच्यावर अतिप्रसंग करण्याचा प्रयत्न करत असताना त्यांनी दिलेल्या तीव्र प्रतिकारामुळे त्याने धारदार शस्त्राने डोक्यावर व हातावर वार करून त्यांची हत्या केल्याचे आरोपीने मान्य केले. आरोपी अंकुश पाटील याला पुढील तपासासाठी पन्हाळा पोलिसांच्या ताब्यात देण्यात आले आहे. 

ही कामगिरी पोलीस अधीक्षक  नीलोत्पल, अप्पर पोलीस अधीक्षक आण्णासाहेब जाधव आणि उपविभागीय पोलीस अधिकारी आप्पासाहेब पवार यांच्या मार्गदर्शनाखाली पोलीस पथकाने फत्ते केली.