कोल्हापूर : जागतिक तंबाखू विरोधी दिनानिमित्त जिल्हा प्रशासन, आरोग्य विभाग आणि पोलीस प्रशासनाच्या संयुक्त विद्यमाने जिल्हाभर विविध जनजागृतीपर व दंडात्मक उपक्रम राबविण्यात आले. सामान्य रुग्णालय, उपजिल्हा व ग्रामीण रुग्णालये, प्राथमिक आरोग्य केंद्रे तसेच हिंदू हृदयसम्राट बाळासाहेब ठाकरे आपला दवाखाना येथे विविध कार्यक्रमांचे आयोजन करण्यात आले.

  या मोहिमेअंतर्गत जिल्हाधिकारी डॉ. विजय राठोड यांनी सोशल मीडियाच्या माध्यमातून तरुण, पालक व शिक्षकांना तंबाखूजन्य पदार्थांच्या दुष्परिणामांबाबत जागरूक करणारा संदेश दिला.कोल्हापूर शहराला स्वच्छ व सुंदर बनविण्याच्या उद्देशाने महापौर रूपाराणी निकम यांच्या हस्ते तंबाखूमुक्त व थुंकीमुक्त कोल्हापूर अभियानाचा शुभारंभ करण्यात आला.

  गडहिंग्लज पंचायत समिती कार्यालय तसेच शाहूपुरी व गांधीनगर पोलीस ठाण्यात अधिकारी व कर्मचाऱ्यांसाठी विशेष मौखिक आरोग्य तपासणी शिबिरे आयोजित करण्यात आली. कागल तालुक्यातील कसबा सांगाव येथे पोस्टर स्पर्धा, पन्हाळा तालुक्यातील बोरपाडळे येथे जनजागृती रॅली, तर शिरोळ व हातकणंगले तालुक्यातील आरोग्य संस्थांमध्ये रांगोळी, वक्तृत्व स्पर्धा व तंबाखूमुक्तीची शपथ कार्यक्रम घेण्यात आले.

  जनजागृतीबरोबरच कोटपा कायद्याचे उल्लंघन करणाऱ्यांविरोधात संयुक्त पथकाने कठोर कारवाई केली. मध्यवर्ती बस स्थानक, रेल्वे स्थानक, शाळा व महाविद्यालय परिसरात तपासणी मोहीम राबवून 2 हजार 600 रुपयांचा दंड वसूल करण्यात आला. तसेच गांधीनगर परिसरात सार्वजनिक ठिकाणी तंबाखूजन्य पदार्थांची विक्री व धूम्रपान करणाऱ्यांविरोधात कारवाई करून 5 हजार रुपयांचा दंड वसूल करण्यात आला. अशा प्रकारे एकूण 7 हजार 600 रुपयांचा दंड आकारण्यात आला. कोल्हापूर जिल्हा तंबाखूमुक्त करण्यासाठी नागरिकांनी, विशेषतः तरुणांनी, या जनजागृती मोहिमेत सक्रिय सहभाग घ्यावा, असे आवाहन जिल्हा प्रशासनाने केले आहे.