कोल्हापूर: कोल्हापूर शहरात वाढत्या घरफोडीच्या घटनांनी नागरिकांमध्ये चिंतेचे वातावरण असतानाच, स्थानिक गुन्हे अन्वेषण शाखेने एका अत्यंत धाडसी कारवाईत घरफोडी करणाऱ्या अट्टल टोळीला बेड्या ठोकल्या आहेत. शिंगणापूर येथील एका बंद घराचे कुलूप तोडून लाखो रुपयांचा ऐवज लंपास करणाऱ्या या टोळीने पोलिसांना आव्हान दिले होते, मात्र पोलिसांनी आपल्या 'नेटवर्क'च्या जोरावर अवघ्या काही दिवसांतच या गुन्ह्याचा छडा लावला आहे.

  तपासाची चक्रे फिरवत असताना स्थानिक गुन्हे अन्वेषण शाखेच्या पथकाला गुप्त बातमीदाराकडून महत्त्वाची माहिती मिळाली. या माहितीच्या आधारे पोलिसांनी राजारामपुरी परिसरात सापळा रचून आदित्य संजय चौगुले, विनोद शिवाजी कलकुटकी आणि शुभम राजेंद्र हेडगे या तिघांना ताब्यात घेतले. या चोरट्यांच्या घराची झडती घेतली असता, चोरीला गेलेल्या मालापैकी ७७ ग्रॅम सोने, १५० ग्रॅम चांदी आणि १८,००० रुपये रोख रक्कम असा एकूण १२,४६,९२० रुपयांचा ऐवज जप्त करण्यात पोलिसांना यश आले आहे.

  आरोपींनी गुन्ह्याची कबुली दिल्यानंतर, त्यांना पुढील कायदेशीर कारवाईसाठी करवीर पोलीस ठाण्याच्या हवाली करण्यात आले आहे. पोलीस अधीक्षक श्री. नीलोत्पल, अप्पर पोलीस अधीक्षक श्री. आण्णासाहेब जाधव आणि उपविभागीय पोलीस अधिकारी श्री. सुजितकुमार क्षीरसागर यांच्या मार्गदर्शनाखाली ही कारवाई करण्यात आली. स्थानिक गुन्हे अन्वेषण शाखेच्या पोलीस निरीक्षकांसह त्यांच्या संपूर्ण टीमने दाखवलेल्या या तत्परतेमुळे कोल्हापूर पोलीस दलाच्या कार्यक्षमतेवर पुन्हा एकदा शिक्कामोर्तब झाले आहे.