कोल्हापूर जिल्ह्यातील कागल तालुक्यातील बिद्री येथील 'श्रद्धा हॉस्पिटल'मध्ये सुरू असलेल्या बेकायदेशीर गर्भलिंग निदान रॅकेटचा पोलिसांनी पर्दाफाश केला आहे. या कारवाईत पोलिसांनी मुख्य सूत्रधार डॉक्टर. युवराज पाटील आणि त्याचा एजंट संभाजी वसंत शिंदे या दोघांना रंगेहाथ अटक केली आहे. त्यांच्याकडून तब्बल १२ लाख ३० हजार रुपयांची रोकड आणि महागडी फॉर्च्युनर गाडी जप्त केली आहे.

कोल्हापूर जिल्ह्यात काही डॉक्टरांकडून बेकायदेशीर गर्भलिंग चाचणी व स्त्रीभ्रूण हत्या केली जात असल्याची गोपनीय माहिती पोलीस अधीक्षक योगेश कुमार यांना मिळाली होती. याची सत्यता पडताळण्यासाठी सहायक पोलीस निरीक्षक क्रांती पाटील यांनी एका चार महिन्यांच्या गर्भवती महिलेला 'बनावट ग्राहक' म्हणून पाठवले. एजंट संभाजी शिंदे याने या चाचणीसाठी २२ हजार रुपयांची मागणी केली. डॉक्टर युवराज पाटील यांनी चाचणी प्रक्रिया सुरू करताच पोलिसांनी धाड टाकून दोघांना ताब्यात घेतले.

या छाप्यात पोलिसांनी केवळ पैसेच नव्हे, तर गुन्ह्यात वापरले जाणारे एक 'पोर्टेबल सोनोग्राफी मशीन', गर्भपाताच्या गोळ्यांची पाकिटे, जेलच्या बाटल्या, दोन सॅमसंग टॅब आणि तीन मोबाईल फोन जप्त केले आहेत. विशेष म्हणजे, डॉक्टर युवराज पाटील याच्यावर यापूर्वीही राधानगरी आणि भुदरगड पोलीस ठाण्यात अशाच प्रकारचे गंभीर गुन्हे दाखल असल्याचे तपासात समोर आले आहे.

ही धाडसी कारवाई पोलीस अधीक्षक योगेश कुमार गुप्ता, अपर पोलीस अधीक्षक धीरजकुमार बच्चू आणि स्थानिक गुन्हे अन्वेषण शाखेच्या पथकाने यशस्वीरित्या पार पाडली. या घटनेमुळे कोल्हापूर जिल्ह्यात मोठी खळबळ उडाली असून, बेकायदेशीर वैद्यकीय व्यवसाय करणाऱ्यांचे धाबे दणाणले आहेत. पोलीस आता या रॅकेटमध्ये अजून कोणाचे हात गुंतले आहेत, याचा अधिक तपास करत आहेत.